«Սառը պատերազմի» առաջին տարիներին ԱՄՆ կառավարությունը մտավախություն է ունեցել, որ խորհրդային զորքերը կներխուժեն Ալյասկա, և այնտեղ ստեղծել է գործակալական ցանց՝ հետախուզական գործողությունների համար: Associated Press-ի փոխանցմամբ՝ այս մասին են վկայում ԱՄՆ-ի Հետախուզությունների դաշնային բյուրոյի և Ռազմաօդային ուժերի հատուկ հետաքննությունների վարչության գաղտնազերծած փաստաթղթերը:
Նախագիծը ստացել է Washtub ծածկագրային անվանումը: Այն մշակվել է ՀԴԲ առաջին տնօրեն Էդգար Հուվերի և ԱՄՆ ռազմածովային ուժերի Հատուկ հետաքննությունների բաժնի պետ Ջոզեֆ Քերոլի կողմից:
Նշվում է, որ Ալյասկայի բռնազավթման դեպքում գործակալները պետք է թաքնվեին հատուկ թաքստոցներում և տեղեկություններ հաղորդեին խորհրդային զորքերի տեղաշարժի մասին:
Այդ նպատակով ԱՄՆ կառավարությունը հավաքագրել է ամենատարբեր մասնագիտությունների տեր մարդկանց՝ ձկնորսների, որսորդների, օդաչուների: Ալյասկայի բնակչության հավաքագրումը տեղի է ունեցել 1951-ից 1959 թվականներին: