Սրտանոթային հիվանդություններն ամբողջ աշխարհում կազմում են մահացության պատճառների 50 տոկոսից ավելին: Մարդու ամբողջ կյանքի ընթացքում սիրտն անդադար աշխատում և իր վրա է կրում մի շարք սթրեսների ու բարդությունների ազդեցությունը: Զարկերակային բարձր կամ ցածր ճնշումը, սրտխփոցները, սրտանոթային համակարգի մի շարք հիվանդություններ սրվում են հատկապես ամռանը:
Ուսումնասիրությունները, որոնք տևել են շուրջ տասը տարի, հաստատում են հիվանդությունների սեզոնային բնույթի փոփոխությունները:
Անդրադառնանք մի քանի սրտանոթային հիվանդությունների, որոնք լայն տարածում ունեն ինչպես ամբողջ աշխարհում, այնպես էլ Հայաստանում:
Զարկերակային բարձր ճնշումը քրոնիկ հիվանդություն է: Արյան բարձր ճնշումը կամ զարկերակային գերճնշումը չափվում է 2 ցուցանիշով՝ սիստոլիկ և դիաստոլիկ: Այս երկու ցուցանիշներն իրենց արձանագրած թվերով ներկայացնում են սրտի վիճակը տվյալ պահին:
Պետք է հստակ տարբերակել արյան բարձր ճնշման տեսակը: Գոյություն ունի առաջնային գերճնշում, որը հանդես է գալիս որպես անկախ, առանձին հիվանդություն. սա շատերին հայտնի հիպերտոնիա հիվանդությունն է: Տարբերում ենք նաև երկրորդային գերճնշում, որի հիմքում մեկ այլ հիվանդություն է:
Սրտային հիվանդություններից տարածվածությամբ երկրորդ տեղում է սրտի իշեմիկ հիվանդությունն իր դրսևորումներով: Դրսևորումներից են՝ սրտամկանի ինֆարկտը, սրտային անբավարարությունը, վատագույն դեպքում՝ հանկարծակի մահը: Իշեմիկ խնդիրներ առաջանում են այն ժամանակ, երբ սրտամկանում թթվածնի պահանջը չի համապատասխանում նրա մատակարարմանը: Հիվանդության ռիսկի գործոնները շատ են, դրանց մի մասն անգամ փոփոխման ենթակա չէ: Չփոփոխվող գործոններից են սեռը, տարիքը:
