«Հանս Քրիստիան Կոֆոեդ» հայ-դանիական բարեգործական հիմնադրամի անօթևանների կենտրոնում այս պահին 100 ժամանակավոր բնակիչներ կան, 100–ից 25–ը ունեն լուրջ հոգեկան խնդիրներ, նրանց մի մասը ունի համապատասխան ախտորոշում, մի մասը՝ ոչ:
«Առաջին լրատվական»-ի հետ զրույցում կենտրոնի բժշկուհի Մալվինա Ջամալյանն ընդգծում է, որ այսպիսի մարդկանց հետ աշխատելը դժվար է՝ համապատասխան պայմաններ և պարագաներ չկան, բացի այդ՝ այսպիսի մարդկանց անօթևանների կենտրոն ուղորդելը կանոնակարգի խախտում է, նրանք պետք է լինեն հատուկ հաստատություններում: Իսկ հիմա մեկ հարկի տակ ապրում են քիչ թե շատ՝ հոգեկան առումով առողջ և անառողջ մարդիկ, որոնց, անկախ հիվանությունից, փողոցում թողնել հնարավոր չէ, բայց այս իրավիճակն էլ ռիսկային է:
Կենտրոնի տնօրեն Շավարշ Խաչատրյանը մեզ հետ զրույցում ընդգծեց. «Մարդկանց հոգեբուժարան տեղափոխելը շատ դժվար է, քանի որ հարազատներից մեկը պետք է դիմի դատարան` հիվանդին անգործունակ ճանաչելու համար, որից հետո նոր կարող են տեղափոխել, այս դեպքում բարեկամներ չկան, անգամ հոգեբուժարանում հայտնվելու դեպքում բուժումից հետո անօթևանները չեն կարող այնտեղ մնալ, խոսքը 30-ից մի փոքր ավել օրերի մասին է»: Ըստ նրա՝ կառավարությունը խոստացել է խնդիրը լուծել այսպիսի մարդկանց համար խնամքի կենտրոն ստեղծելով, հիմա կա, բայց մարզերից մեկում:
Անօթևանների կենտրոնում ճակատագրի բերումով ամենատարբեր մարդիկ են հայտնվում. կրթված, անկիրթ, ընտանիք ունեցողներ և չունեցողներ: Այստեղի ժամանակավոր բնակիչներից են նաև ազատամարտիկներ Արսեն Օհանյանը և Հրաչ Ավանեսյանը, որոնք մեդալներ ունեն, այդ թվում՝ Վազգեն Սարգսյանի անվան: Սակայն այս մարդիկ, որպես ազատամարտիներ, թոշակ չեն ստացել, նրանց թոշակի հարցը կարգավորվել է այստեղ հայտնվելուց հետո: Այստեղ բնակիչները օրվա ընթացքում երկու անգամ են սնվում, կարողանում են դուրս գալ նաև աշխատանք փնտրելու, բայց նրանց մեծամասնությունը հիմնականում գործատուի պահանջներին չի համապատասխանում։
Ցավալին այն է, որ այս մարդիկ կացարանում կարող են մնալ ընդամենը 6 ամիս: Պետբյուջեից կացարանին տրվում է տարեկան 56 մլն դրամ, ինչը չի բավարարում, որպեսզի բացի սննդից ու կոմունալ վճարներից, կարողանան նորմալ հագուստ, սպիտակեղեն ձեռք բերել. այդ պարագաները բարեգորածական միջոցառումների արդյունքում են կենտրոն հասնում: Նշենք նաև, որ կենտրոնից օգնության համար բազմաթիվ օլիգարխների նամակներով դիմել են, բայց մեծահարուստները օգնություն տալուց հրաժարվել են, իսկ կենտրոնում ոչ թե գումար, այլ վերմակ, սպիտակեղեն են խնդրել, թեկուզ՝ օգտագործած:
Առավել մանրամասն՝ տեսանյութում։