Հունիսի 29-ին՝ մուսուլմանների համար սուրբ ռամադան ամսվա առաջին օրը, Իրաքի մի զգալի հատվածը գրաված «Իրաքի և Լևանտի իսլամական պետություն» (ընդունված է նաև անվանել «Իրաքի և Շամի իսլամական պետություն» կամ «Իրաքի և Ասորիքի իսլամական պետություն»՝ ISIL) ծայրահեղ իսլամիստական խմբավորումը հայտարարություն տարածեց Սիրիայի Հալեպ քաղաքից մինչև Իրաքի Դիյալա քաղաք ընկնող տարածքում խալիֆաթ ստեղծելու մասին։ Խմբավորման ղեկավար Աբու Բաքր Ալ-Բաղդադին հռչակվել է «խալիֆ և բոլոր մուսուլմանների առաջնորդ»։ Այս ամիսների ընթացքում Իսլամական պետությունը սպառնալիք է դարձել Մերձավոր Արևելքի և ավելի լայն տարածաշրջանի համար:
«Առաջին լրատվական»-ի հետ զրույցում Ժնևի CIMERA կենտրոնի ներկայացուցիչ, քաղաքական վերլուծաբան Վիգեն Չետերյանն ասաց, որ «Իսլամական պետությունը» այժմյան աշխարհի տոտալիտար ծրագիրն է, ահռելի մարտահրավեր ոչ միայն տարածաշրջանի փոքրամասնությունների, այլև մեծամասնությունների և երկրների համար: Չետերյանի գնահատմամբ՝ այս խմբավորման ընդլայնման վտանգը ներկայումս չափազանց մեծ է, քանի որ Միջին Արևելքի քաղաքական դաշտը անկայուն վիճակում է, որը բարենպաստ նախապայման է խալիֆաթի սահմանների ընդլայնման համար: Վերլուծաբանի կարծիքով՝ ISIS-ի սահմանները չի բացառվում, որ հասնեն նաև Հարավային Կովկասին:
«Այնուամենայնիվ ես չեմ կարծւմ, որ ISIS-ը կարող է այս փուլում սպառնալիք լինել Հայաստանի համար: Իմ կարծիքով՝ «Իսլամական պետությունը» կարող է վտանգ լինել ապագայում Ադրբեջանի համար: Հիմա ուղիղ վտանգ չկա, բայց նպատակները կարող են այդ երկրները վտանգի տակ դնել, մանավանդ հարանվանական հակասություններ ստեղծելով և հենց դրանք հաշվի առնելով: Մանավանդ որ, որոշ տվյալների համաձայն, բազում ադրբեջանցիներ, որոնք մասնակցել են Սիրիայի և Իրաքի պատերազմում ISIS-ի տանիքի ներքո, արդեն սպանված են, ISIS-ը կարող է սպառնալիք դառնալ Ադրբեջանի տարբեր համայնքների համար, այսինքն՝ շիա փոքրամասնության և սուննի մեծամասնության համար: Ադրբեջանի համար սա շատ լուրջ հարց է, ու չեմ կարծում, թե իրենց ղեկավարությունը համապատասխան գիտակցությունն ունի այս վտանգները հաշվարկելու և դրանց դիմագրավելու համար»,- ասաց Վիգեն Չետերյանը՝ միևնույն ժամանակ չհերքելով մերձավորարևելյան իրադարձություններին Հայաստանից հետևելու ու հնարավոր սպառնալիքներին դիմագրավելու պատրաստակամության անհրաժեշտությունը:
Չետերյանը նաև նշեց, որ չի տեսնում տարածաշրջանային որևէ ուժի, որը ներկայումս ունակ է ISIS-ի դեմն առնելուն: «Տարածաշրջանային երկրներում տարբեր խավերի պահանջները խորացնելու են և բարենպաստ հիմք են դառնալու այդ խմբավորման ընդլայնման համար: Չեմ կարծում, որ երկրները կունենան այդքան հասունություն: Պետք է կայունությամբ պայքարեն երկրներն այս տոտալիտար ծրագրի դեմ»,- ասաց նա:
