«Հրապարակ» թերթը գրում է. «Կուրսանտներ, պատրա՛ստ, ըստ վաշտերի աջ դա՛րձ». այս խոսքերն էին երեկ հնչում Վարդան Մամիկոնյանի արձանի հարևանությամբ գտնվող այգում։ Վազգեն Սարգսյանի անվան ռազմական ինստիտուտի կուրսանտների երդման արարողությունն այս անգամ տեղի էր ունենում երևանցիների աչքի առջև։ Անծանոթ մարդիկ կանգնած նայում էին ու հուզված ասում. «Դեռ երեխաներ են ու արդեն զինվորական շորերով, Աստված պահի»։
Այս տարի առաջին անգամ ռազմական ինստիտուտում սովորելու հնարավորություն ունեն նաև իգական սեռի ներկայացուցիչները։ Չնայած այս փորձը նոր է, սակայն 10-ից ավելի աղջիկների նկատեցի։ Շարքում ձիգ կեցվածքով կանգնած 19-ամյա Ռոզային հարցնում եմ՝ ինչպե՞ս որոշեց դառնալ զինվորական, մեղմ ժպտում է և առանց կեցվածքը փոխելու պատասխանում. «Ինձ դուր է գալիս, ես սիրում եմ զինվորական գործը։ Եթե աղջիկ եմ, չի նշանակում, որ չեմ կարող պաշտպանել իմ հայրենիքը։ Ճի՛շտ այդպես, տղաների չափ ուժեղ ենք»։
Գյումրիից եկած Ռոզան պատմում է, որ իրենք աշխատում և սովորում են տղաների նման՝ չկա ոչ մի խտրականություն. «Սեպտեմբերի 1-ից կսկսvեն դասերը, մենք կսովորենք նրանց հետ հավասար»։ Աղջիկների ծնողներն էլ ավելի հպարտությամբ ասացին, որ երբևէ չեն մտածել իրենց երեխաների նպատակներին խոչընդոտել. «Եթե ուզում են զինվորական դառնալ, ինչո՞ւ չէ։ Ընդհակառակը, մենք ուրախ ենք։ Եթե մի գործ սիրով ես անում, ուրեմն ամեն ինչ կստացվի»։
Մանրամասները՝ թերթի այսօրվա համարում