Իսլանդիայում և Պապուա Նոր Գվինեայում հրաբխային ժայթքումներ են սկսվել, հայտնում է BBC-ն: Երկու դեպքում էլ հրաբխային մոխրի արտանետումները կարող են սպառնալ օդային հաղորդակցությանը, քանի որ տեղի են ունենում պարբերական երթուղիների անմիջական հարևանությամբ: Իսլանդական Բարդարբունգի արտանետումները դեռ պետք է գնահատել, իսկ Օվկիանիայում արդեն սկսել են չեղյալ հայտարարել քաղավիացիայի թռիչքները:
BBC-ն նշում է, որ երկու օր առաջ հրաբխի մակերևույթին փոսերն ու անցքերը հասել են 10-15 մետր լայնության և 1 կմ խորության:
Անցած օրերի ընթացքում ավտոմատ համակարգն արձանագրել է ավելի քան 1100 ստորգետնյա ցնցում՝ 8-12 կմ խորության վրա:
AccuWeather կայքը զգուշացնում է, որ ժայթքումը կարող է լրջորեն ազդել միջազգային օդային հաղորդակցության վրա: Բարդարբունգի հրաբխային մոխիրը կտեղափոխվի հարավ՝ հասնելով կենտրոնական կամ արևմտյան Ատլանտիկա:
Միաժամանակ Պապուա Նոր Գվինեայի Նոր Բրիտանիա կղզում սկսել է ժայթքել Տավուրվուր հրաբուխը: ABC.net-ի հաղորդմամբ՝ ժայթքումը սկսվել է ուրբաթ առավոտյան:
News.com.au-ն, հղում անելով Դարվինում հրաբխային մոխրին հետևող կենտրոնին, հայտնում է, որ հրաբխի մոխրի ամպը դանդաղ շարժվում է հարավ-արևմուտք և արդեն հասել է ինքնաթիռների բարձրանալու մակարդակի: