Վրաստանի նախագահի և վարչապետի սրվող հարաբերությունների հերթական ապացույցն է դարձել Թուրքիայի նախագահի երդմնակալության արարողությանը վրաց նախագահ Գեորգի Մարգվելաշվիլու փոխարեն վարչապետ Իրակլի Գարբաշվիլու մասնակցությունը: Մինչդեռ սահմանադրության համաձայն՝ նախագահը լիազորված է անվիճարկելի ներկայացուցչական ֆունկցիաներով:
Այն մասին, որ Ռեջեփ Թայիփ Էրդողանի երդմնակալության արարողությանը նախագահի փոխարեն վարչապետը կմասնակցի, լրագրողներին տեղեկացրել է երկրի ԱԳ նախարար Մայա Փանջիկիձեն: Նախարարը դա բացատրել է նրանով, որ Մարգվելաշվիլին «այցով արդեն եղել է Թուրքիայում», ինչպես նաև Թբիլիսիում շփվել է Թուրքիայի նախկին նախագահ Աբդուլա Գյուլի հետ: «Այդ պատճառով էլ ավելի լավ կլինի, որ այս անգամ վարչապետ մեկնի,- հայտարարել է Փանջիկիձեն և ընդգծել,- Իրակլի Գարիբաշվիլին նշանակումից հետո դեռ ոչ մի անգամ Թուրքիայում չի եղել»:
Թուրքիայում Վրաստանի դեսպան Լևան Ցինցաձեն փորձել է կառավարական նախաձեռնությունը ուժեղացնել Թուրքիայի նորընտիր նախագահի հետ հանդիպման հնարավորությամբ: «Երդմնակալության արարողությունից հետո վարչապետը բանակցություններ կանցկացնի Թուրքիայի նախագահի հետ»,- հայտնել է դիվանագետը:
Մինչդեռ, ինչպես kommersant-ի հետ զրույցում նշել է Premier պարբերականի թղթակից Զուրաբ Գոգոբեիձեն՝ «արարողակարգերի ընթացքում լուրջ և առարկայական բանակցություններ չեն անցկացվում», իսկ խորհրդանշական հանդիպման համար երկրի նախագահն ավելի հարմար կլիներ, քան կառավարության ղեկավարը: «Վերջիվերջո, ներկայացուցչական ֆունկցիան վերջինն է, ինչ Մարգվելաշվիլուն մնացել է բոլոր ուղղություններով նրա լիազորությունները կրճատելուց հետո»,- նշել է Գոգոբեիձեն՝ նկատի ունենալով Ազգային անվտանգության խորհրդի լիազորությունների, Գլխավոր շտաբի ղեկավար նշանակելու, ինչպես նաև շատ այլ հարցերի շուրջ նախագահի և վարչապետի տարաձայնությունները:
Թբիլիսիում կարծում են, որ Իրակլի Գարիբաշվիլու և Գեորգի Մարգվելաշվիլու միջև տարաձայնությունները հատկապես ուժեղացել են նախկին նախագահ Միխեիլ Սաակաշվիլու կողմից անօրինական ծախսերի մասին փաստաթղթերի գաղտնազերծումից հետո: Գոգոբերիձեի կարծիքով՝ «կարմիր գիծը» հատվել է, երբ նախագահ Մարգվելաշվիլին հրաժարվել է նախկին նախագահի կողմից անձնական նպատակներով ծախսված պետական միջոցների փաստը հաստատող պետական պահպանության հատուկ ծառայության փաստաթղթերի վրայից հանել «գաղտնի» գրառումը:
Իսկ քաղաքագետ Իոսիֆ Ցիսկարիշվիլու կարծիքով՝ նախագահի և վարչապետի միջև անդադար խնդիրները «պաթոլոգիական բնույթ են ստանում»: Նրա խոսքերով՝ «այդ ամենի պատճառը միլիարդատեր Բիձինա Իվանիշվիլու հայտարարությունն է այն մասին, թե ինքը հիասթափվել է Մարգվելաշվիլուց, որին անձամբ էր առաջադրել նախագահի պաշտոնում»:
Հարց այն մասին, թե միջազգային արարողություններին ով պետք է ներկայացնի Վրաստանը, մեկ անգամը չէ, որ բարձրացվել է: Դիվանագիտական ակադեմիայի ռեկտոր Իոսիֆ Ցինցաձեն հիշեցրել է, որ ավելի վաղ վարչապետն ագելել է նախագահին ստորագրել ԵՄ-ն հետ ասոցացման համաձայնագիրը, իսկ ինքը մեկնել է Բրյուսել՝ պատրաստելու փաստաթղթերը: «Սակայն երբ խոսքը Վրաստանի համար տապալիչ ՆԱՏՕ-ի գագթնաժողովի մասին է, որտեղ մեզ կմերժեն ալյանսին անդամակցելու «ճանապարհային քարտեզ» տրամադրել, ապա այնտեղ կուղարկեն նախագահին»,- կիսվել է քաղաքագետը:
