Samsung Electronics ընկերությանը դարձյալ կասկածել են Չինաստանում մանկական աշխատուժի շահագործման համար, գրում է The Financial Times-ը:
Հարավկորեական արտադրողի հասցեին քննադատությամբ է հանդես եկել Նյու Յորքից իրավապաշտպան խումբ՝ China Labor Watch-ը:
Խմբի տեղեկությունների համաձայն՝ Գուանդուն նահանգում գտնվող HEG Electronics ֆաբրիկան, որը Samsung-ի և Lenovo-ի մատակարարն է, աշխատանքի է վերցրել 16 տարեկանից ցածր տասնյակ երեխաների:
Ինչպես հիշեցնում է թերթը, 2012-ին China Labor Watch-ը արդեն քննադատել էր Samsung-ին նմանատիպ ենթադրյալ խախտումների մասին այդ գործարանում:
Ըստ CLW-ի՝ 2014-ի հուլիս և օգոստոս ամիսներին HEG Electronics-ում իրավիճակը ոչ միայն չի լավացել, այլևս ավելի վատացել է:
Samsung-ն իր հերթին հանդես է եկել այդ տեղեկության հերքմամբ, Lenovo-ն դեռ մեկնաբանություն չի ներկայացրել: