«Իսլամական պետություն» ծայրահեղական խմբավորման զինյալները, որոնք գրոհել են Իրաքի հյուսիսային և արևմտյան շրջանները, բազմամիլիոնանոց եկամուտներ են ստանում Իրաքից և Սիրիայից մաքսանենգ նավթի վաճառքից: Այս մասին հայտնում է Wall Street Journal-ը՝ հղում անելով փորձագետներին:
Ավելի վաղ համարվում էր, գրում է պարբերականը, որ խմբավորումը ֆինանսավորում է ստանում հովանավորերից: Հիմա «Իսլամական պետությունը» «հսկա կազմակերպություն է, որն ինքն է իրեն ֆինանսավորում: Նրանք քիչ թե շատ կայուն տնտեսություն ունեն Սիրիայի և Իրաքի տարածքում»,- հայտարարել է «Ալ-Քաիդայի» և «Իսլամական պետության» հարցերով փորձագետ Հասան Աբու Հանիեն:
WSJ-ի տվյալներով՝ զինյալները թեթև նավթը վաճառում են շուկայականից շատ ավելի ցածր գնով՝ 1 բարելը 60 դոլարով: Սիրիայի՝ «Իսլամական պետության» վերահսկողության տակ գտնվող նավթի հանքավայրերում արտահանվում է օրական 30-70 հազար բարել նավթ: Օգոստոսի սկզբին վերլուծաբան Ռոբին Միլսը ABC հեռուստաալիքին ասել էր, որ Սիրիայից և Իրաքից նավթի վաճառքից «Իսլամական պետության» օրական եկամուտները հասնում են 3 մլն դոլարի:
«Իսլամական պետության» եկամտի աղբյուր են նաև պատանդների համար ստացվող փրկագները, շորթումը, թալանը, նաև անհատների նվիրատվությունները:
