Ամիրյան 4/4-ի բնակիչները մինչ օրս պայքարում են իրենց բնակարանների համար, որն իրենց ձեռքից ժամանակին խլել է Հովիկ Աբրահամյանը՝ մարդկանց բնակարանների տեղում կառուցելով իր և որդուն պատկանող Hotel National հյուրանոցային համալիրը, որը սկզբում Հովիկ Աբրահամյանին չի պատկանել: Հյուրանոցը սկզբում կառուցել է ԱԺ ՀՀԿ խմբակցության անդամ, հանգուցյալ Մելիք Գասպարյանը, որի մահից հետո Հովիկ Աբրահամյանը պարզապես խլել է շենքը Գասպարյանի ընտանիքից, ավելի կոնկրետ՝ որդուց, որը հիմնականում զբաղվում էր շենքի հարցերով: Աբրահամյանները չնչին կոպեկներով խաղից հեռացրին Գասպարյանի որդուն, որը դրանից հետո գտնվում էր Դուբայում:
Վերջին շրջանում, սակայն, Ամիրյանի տուժած բնակիչների և այս կիսավարտ շենքի շինարարներից մի քանիսի խոսքով, Գասպարյանի որդին կրկին խաղի մեջ է մտել: Նա նշված տարածքում ՍՊԸ է հիմնել, որը պետք է զբաղվի շենքի օֆիսային տարածքները վարձակալության տալով, ինչպես նաև ավարտին հասցնի շինարարությունը՝ հետևելով աշխատանքների կատարմանը:
Շինարարներից մեկի խոսքով՝ այս օրերին Գասպարյանի որդին էժան վերելակներ է փնտրում, որպեսզի գոնե վերելակները տեղադրվի: Կարծիք կա, որ Աբրահամյանները դիտավորյալ են կրկին խաղի մեջ ներգրավել Գասպարյանին, որպեսզի անհրաժեշտ պահին, երբ բնակիչները հերթական անգամ պահանջեն վերադարձնել իրենց բնակարանները կամ ավարտին հասցնել կիսակառույցը, Աբրահամյանները վրդովված բնակիչներին դեմ տան Գասպարյանի որդուն և ազատվեն լրացուցիչ պարտականություններից: «Իսկ Գասպարյանի որդուն համոզելու ձև նրանք գիտեն»,- նկատեց մեր զրուցակիցը:
Ինչ վերաբերում է փողոցում հայտնված բնակիչներին, ապա «Առաջին լրատվական»-ի հետ զրույցում նրանք ասացին, որ իրենց բնակարանների հատվածում այդպես էլ որևէ շինարարություն չի կատարվում: Շինաշխատանքներ իրականացվում են միայն Հովիկ Աբրահամյանի որդուն պատկանող հատվածում, շենքի B բլոկում, որի ամբողջ 8-րդ հարկն արդեն լրիվ պատրաստ է: Բնակիչները ճարահատյալ համաձայնում են հրաժարվել այդ շենքում բնակարան ունենալու մտքից և տարածքը վաճառելով հեռանում են: Բնակիչներից Վաչագանի խոսքով՝ 2-3 ընտանիք այդպես արդեն վաճառել են իրենց տարածքը, ընդ որում՝ շատ ավելի մատչելի գնով, քան որևէ այլ պարագայում կվաճառվեր Ամիրյան փողոցում գտնվող որևէ այլ տարածք: «Ես էլ ճարահատյալ համաձայնել եմ քառակուսի մետրը 1000 ԱՄՆ դոլարին համարժեք գնով վաճառել տարածքը: Ուրիշ տարբերակ չունեմ: Միակ լուծումը սա է, հակառակ դեպքում գուցե սա էլ չունենանք, սա էլ խլեն մեզանից: Ու ասեմ, որ տարածքները մեզանից գնողները նույնպես Հովիկ Աբրահամյանի մարդկանցից են: Այսինքն՝ նրանք այդպիսով երկու խնդիր լուծեցին՝ մեզ զրկեցին մեր բնակարաններից և ամբողջ տարածքը սեփականացրին՝ դարձնելով բիզնես-կենտրոններ և ռեստորաններ: Սա է մեր երկիրը»,- դժգոհեց մեր զրուցակից բնակիչը:
Լուսանկարը՝ Shamshyan.com-ի