Նանկինում ընթացող պատանիների երկրորդ օլիմպիական խաղերի վերջին օրը Հայաստանի հաշվին երկու բրոնզե մեդալ գրանցեցին ազատ ոճի ըմբիշները: 54 կգ քաշային կարգում Վաղինակ Մաթևոսյանը խմբային փուլում տոնելով 3 հաղթանակ և կրելով մեկ պարտություն` իրավունք ստացավ պայքարելու բրոնզե մեդալի համար:
Եմենցի մարզիկի հետ գոտեմարտը շատ հաջող ստացվեց հայ ըմբիշի համար, և նա ժամանակից շուտ, միավորների բացահայտ առավելությամբ հաղթեց ու կանգնեց պատվո պատվանդանի երրորդ աստիճանին:
Բրոնզե ավարտ ունեցավ նաև 76 կգ քաշային Սարգիս Հովսեփյանիմրցելույթը: Սարգիսը խմբային փուլի առաջին գոտեմարտը պարտվեց ճապոնացի ըմբիշին, այնուհետև երկու տպավորիչ հաղթանակ տոնեց և նույնպես իրավունք ստացավ պայքարելու երրորդ տեղի համար: Բրոնզե մեդալի համար պայքարում հայ ըմբիշը կրկին մեծ առավելությամբ հաղթեց կոլումբիացի մարզիկին:
Այսպիսով` Հայաստանի երեք ըմբիշներն էլ տուն են վերադառնում մեդալներով: Նախօրեին արծաթե մեդալ էր նվաճել հունահռոմեկան ոճի 58 կգ քաշային ըմբիշ Զավեն Միքաելյանը:
Հայաստանի ըմբշամարտի ֆեդերացիայի մամլո ծառայություն
