Իրանը դիվանագիտական միջոցներ չի կիրառի իսրայելական ագրեսիային ի պատասխան, այլ թշնամուն կպատասխանի մարտի դաշտում, հայտարարել են այդ երկրի բարձրաստիճան զինվորականները: Այս մասին գրում է իրանական Fars տեղեկատվական գործակալությունը:
Այս հայտարարությունները հնչել են այն բանից հետո, երբ իսլամական պետության ՀՕՊ միջոցները Նաթանզա շրջանում, որտեղ գտնվում է ուրանի հարստացման ձեռնարկությունը, խփել են, ենթադրաբար, իսրայելական հետախուզական անօդաչու:
«Մեր պատասխանն այդ ագրեսիային կլինի ոչ դիվանագիտական, մենք կպատասխանենք մարտի դաշտում, բայց պարտադիր չէ, որ այդ մասին նախապես հայտարարենք: Թշնամին կհասկանա և կտեսնի»,- օգոստոսի 26-ին Թեհրանում «Բասիջի» նահատակների հիշատակին նվիրված միջոցառման ժամանակ հայտարարել է Իսլամական հեղափոխության պահակազորի կորպուսի լեյտենանտ-հրամանատար, բրիգադային գեներալ Հոսեյն Սալամին:
«Մենք երբեք չենք նահանջում թշնամու առջև: Իսլամական պետությունն ուժեղ է և ունակ է հակահարված տալու ցանկացած տերության ցանկացած մակարդակով, մենք երբեք չենք իջեցնի մեր պահանջների մակարդակը»,- ավելացրել է նա:
Օգոստոսի 24-ին Իսլամական հեղափոխության պահակազորի կորպուսը հայտարարեց, որ իրանական ՀՕՊ միջոցները իսրայելական Hermes անօդաչու ինքնաթիռ են խփել: Իրանական կողմը, սակայն, ոչ մի ապացույց չի ներկայացրել, որ խփված ինքնաթիռն իսրայելական է եղել: Իսրայելզի փորրձագետները միանշանակ նշում են, որ Իրանի ցուցադրած մնացորդները կապ չունեն Hermes արտադրող Elbit ընկերության արտադրանքի հետ: