Հայաստանում Ղազախստանի արտակարգ և լիազոր դեսպան Ա.Ե. Բոզժիգիտովն այն կարծիքին չէ, թե Ղազախստանում ուրախ չեն Հայաստանի՝ Մաքսային միությանն անդամագրվելու կապակցությամբ:
«Ղազախստանում բարյացակամ են Հայաստանի՝ Մաքսային միությանն անդամագրվելու կապակցությամբ, Ղազախստանի նախագահը ստորագրել է Հայաստանի անդամագրման ճանապարհային քարտեզը, այդ պատճառով ոչ մի տարաձանություն չկա: Տեխնիկական հարցերը ժամանակ են պահանջում՝ սկզբում փաստաթղթերի համաձայնեցում, հետո տարատեսակ գործողություններ: Ոչ մի ձգձգում չկա, միայն տեխնիկական հարցեր են»,- վստահեցրեց դեսպանը մի քանի լրատվամիջոցների հետ զրույցում:
Նրա խոսքով՝ Ղազախստանը ոչ մի պահանջ Հայաստանի առջև չի դնում․ «Ճանապարհային քարտեզը անձամբ նախագահն է ստորագրել»,- ասաց նա:
Դեսպանն անդրադարձավ նաև Նազարբաևի կողմից ընթերցված հայտնի նամակին և ասաց, որ այդ գագաթնաժողովն անցկացվում էր Աստանայում, հետևաբար և նամակն էլ նա պետք է կարդար․ «Ամբողջ իմաստն այն է, որ նամակները կարող են ուղարկել տարբեր պետություններ, և ինչու բարձրացրեց Նազարբաևը: Այն պատճառով, որ գագաթնաժողովն անցկացվում էր Աստանայում, և մոդերատորը Նազարբաևն էր»:
Դիտարկմանը, թե Սերժ Սարգսյանը հայտարարում է, որ ոչ բոլորն են ուրախ Հայաստանին տեսնել Մաքսային միությունում, դեսպանը պատասխանեց․ «Դա ձեր նախագահի կարծիքն է՝ ով է ուրախ, ով ոչ: Մաքսային միությունն ու Եվրասիական տնտեսական միությունը տնտեսական ծրագրեր են, քաղաքական հարցեր այստեղ դրված չեն: Ղազախստանը աջակցել է Հայաստանի՝ Մաքսային միությանն անդամագրվելու ճանապարհային քարտեզին: Դա փաստաթուղթ է, չէ՞, իսկ այն, ինչ դուք եք ասում, պարզապես խոսքեր են: Ձեր նախագահն է ասել, որ Հայաստանն անդամագրվելու է Մաքսային միությանն իր սահմաններով»:
«Առաջին լրատվական»-ի այն հարցին, թե արդյոք Եվրասիական տնտեսական միությունն ունի՞ ապագա, եթե հաշվի առնենք այն հանգամանքը, որ անդամ երկրները տարակարծիք են Ռուսաստանի դեմ և Ռուսաստանի կողմից սահմանված պատժամիջոցների հարցում, դեսպանը պատասխանեց․ «Եվրասիական տնտեսական միությունը ունի ապագա: Այն երեք պետությունների միություն է, ապագայում ևս մի քանի պետություն կմտնի: Դուք գիտեք, որ ցանկություն են հայտնել նաև Հայաստանը, Ղրղըզստանը, աշխատանքներ են տարվում նաև ավելի խոշոր երկրների հետ, այդ պատճառով ԵՏՄ-ն շատ մեծ ապագա ունի:
Ինչ վերաբերում է պատժամիջոցներին, ապա դրանք միջանցիկ խնդիրներ են, որ կորոշվեն: Բնականաբար, Ղազախստանը դեմ է բոլոր տեսակի պատժամիջոցների»:
Առավել մանրամասն՝ մեր տեսանյութում:
