Հազարավոր պաղեստինցիներ դուրս են եկել Գազայի հատվածի փողոցներ՝ Իսրայելի հետ 50-օրյա զինված հակամարտությունից հետո երեքշաբթի ուժի մեջ մտած երկարաժամկետ հրադադարը տոնելով որպես սեփական հաղթանակ: Այս մասին հայտնում է RIA Novosti-ն:
Պայմանավորվածությունները, որոնք ձեռք են բերվել Եգիպտոսի միջնորդությամբ, հնարավորություն են տալիս վերջ տալ պաղեստինյան անկլավում իսրայելական բանակի ամենաերկարատև ու արյունալի գործողությանը և վաղեմի տարածքային վեճի լուծման համար բանակցային գործընթաց սկսել:
Երբ 19.00-ին (մեր ժամանակով՝ 20.00-ին) կողմերը դադարեցրել են փոխադարձ գնդակոծությունները, ամբողջ Գազայում ինքնաբուխ ցնծություն է սկսվել: Մարդիկ դուրս են գալիս տներց, շնորհավորում են միմյանց պատերազմի վերջանալու կապակցությամբ, օդ են կրակում, հրավառություն անում: Բարձրախոսներից և մզկիթների մինարեթներից շնորհավորանքներ են հնչում:
Հաղթանակի մասին մամլո ասուլիսների ընթացքում և սոցցանցերում խոսում են նաև անկլավը վերահսկող ՀԱՄԱՍ շարժման առաջնորդները:
Եթե կրակի դադարեցման ռեժիմը պահպանվի, 1 ամիս հետո կողմերը պետք է վերսկսեն Եգիպտոսի միջնորդությամբ հակամարտության վերջնական կարգավորման պայմանների վերաբերյալ բանակցությունները: Ներկա փուլում պաղեստինցիներին խոստացել են Իսրայելի և Եգիպտոսի հետ սահմաններին անցումների աշխատանքի ռեժիմի լիբերալացում՝ անկլավ դրա վերականգնմանն անհրաժեշտ նյութերի և հումանիտար բեռների համար հնարավորությունների ընդլայնման շեշտադրումով: Սպասվում է նաև, որ կընդլայնվի Միջերկրական ծովի ափամերձ տարածքը, որտեղ իսրայեցիները տեղի ձկնորսներին թույլ են տալիս որս անել: