«Մեր ակնկալիքը Հայաստանից նյութական չի եղել, չի եղել այն ակնկալիքը, որ Հայաստանը մի քանի միլիոն դոլար կամ եվրո կտրամադրի, մեր պահանջը, խնդրանքը եղել է դիվանագիտական աջակցությունը», «Առաջին լրատվական»-ի հետ զրույցում ընդգծեց «Սինջար եզդիների ազգային միավորում» ՀԿ նախագահ Բորիս Մուրազինը՝ հավելելով, որ Հայաստանի աջակցությունը, նաև արձագանքը տեղին էր, բայց ուշացած: Ըստ նրա՝ Հայաստանը արդեն իսկ գործնական, դիվանագիտական քայլերի է անցել: Օրինակ ՝ՄԱԿ-ում ՀՀ դեսպանի հայտարարությունը, միջազգային հանրությանը ուղղված կոչը, ֆինանսական աջակցությունը, որը դեռ պետք է ՄԱԿ-ին փոխանցվի: Նա նաև նշեց, որ այսօր ԱԺ փոխնախագահ Էդուարդ Շարմազանովը եզդիների ազգային միության անդամների հետ հանդիպման ընթացքում քննարկել է Իրաքի հյուսիսում եզդիների հանդեպ իրականացվող բռնությունների հարցը և ներկայիս իրադրությունը։ «Ինքը ևս մեկ անգամ վստահեցրեց, որ նախագահի կողմից ստացվել է հանձնարարական, և պետության դիրքորոշումը, որոշումն այն է, որ պետք է ավելի շատ ծառայի եզդիներին որպես խոսափող միջազգային կառույցնրում, մեզ հետ պիտի ակտիվ կապ պաշտպանեն, որպեսզի իրավիճակի փոփոխության դեպքում տեղյակ լինեն, որ մեր դիվանագետները կարողանան միջազգային կառույցների հետ համապատասխան աշխատանք տանեն»,- ասաց նա:
Իսկ հասարակական գործիչ, դասախոս Ռուստամ Բաքոյանը նշեց, որ Հայաստանը ուշացել է, քանի որ արձագանքել է դեպքերից 17 օր անց։ Ըստ նրա՝ երբ տեղի ունեցան Քեսաբի դեպքերը, ինչպես հայրերի, այնպես էլ եզդիների արձագանքն ավելի բուռն էր: Նա նաև նկատեց, որ այսօր իսկապես սայլը տեղից շարժվել է, բայցի այդ՝ ցանկացած օգնություն այսօր կարող է երեխայի կյանք փրկել։ «Կառավարության որոշումների վրա մեծ ազդեցություն ունեցան եզդիական համայնքի ճնշումները, ինչպես նաև հայ հասարակության»,- ասաց Բաքոյանը՝ հավելելով, որ հայ ժողովրդից ակնկալում են այնքան, որքան եզդի ժողովուրդը կաներ:
Ըստ բանախոսների՝ իրավիճակը Հյուսիսային Իրաքում գնալով սրվում է, և միակ լուծումը միայն զենքով պայքարն է, ուստի այսօր խոշոր զենքի կարիք կա, քանի որ իրենց շահերը մարտի դաշտում արդեն առաջ կկարողանան տանել միայն եզդի ջոկատները ազատագրելով իրենց գյուղերը: Նշենք նաև, որ եզդիները զենք են խնդրել ԱՄՆ–ից:
Առավել մանրամասն՝ տեսանյութում։