Վրաստանը պատրաստ է ավելացնել Ռուսաստան արտահանվող գյուղատնտեսական ապրանքների ծավալը և լրացնել դրանց ցանկը: Այս մասին հայտարարել է երկրի գյուղնախարար Օթար Դանելիան, գրում է ITAR-TASS-ը:
Նրա խոսքերով՝ վերջին կես տարում «ՌԴ-ի և Վրաստանի միջև առևտրա-տնտեսական համագործակցության առաջընթաց է գրանցվել»: «Մենք պատրաստ ենք ապագայում զարգացնել այդ գործընթացը»,- հավաստիացրել է նա:
Վրաստանի գյուղնախարարությունը մեջբերում է նաև Վրաստանի Սննդամթերքի ազգային գործակալության ղեկավար Զուրաբ Չեկուրաշվիլիի խոսքերն այն մասին, որ երկիրը պատրաստ է ավելացնել ՌԴ արտահանվող ցիտրուսների, դեղձի, խնձորի, տանձի, սերկևիլի, մեղրի, ինչպես նաև կենդանական ծագման սննդամթերքների ծավալը: Դրանից բացի, նրա խոսքերով, Վրաստանը հետաքրքրված է ցեղական կենդանաբուծության համար ռուսական սերմնահեղուկի և գենետիկ նյութի ներկրմամբ:
Հիշեցնենք, որ 2007-2012թթ. վրացական գյուղատնտեսական ապրանքների, հանքային ջրի և գինիների արտահանումը դեպի Ռուսաստան դադարեցված էր: