Արարատյան հայրապետական թեմի «Ցերեկային կենտրոնը» կազմակերպել էր քննարկում «Թմրամոլության վնասներն ու դրանց ձերբազատման ուղիները» թեմայով: Քննարկմանը մասնակցում էին «Անանուն թմրամոլներ» միջազգային կազմակերպության ռուսաստանյան ներկայացուցիչները, ՀՀ առողջապահության նախարարության, նարկոլոգիական կլինիկայի և մի շարք հասարակական կազմակերպությունների ներկայացուցիչներ:
Ռուսաստանյան ներկայացուցիչները խոսեցին «12 քայլ» միջազգային ծրագրի և Հայաստանում դրա կիրառման հնարավորություններից: «Առաջին լրատվական»-ի հետ զրույցում նրանք ընդգծեցին, որ կախվածությունից ձերբազատվելը հնարավոր է ցանկության դեպքում:
«Մարդիկ հավաքվում են, քննարկում: Սա ինքդ քեզ օգնելու ճանապարհ է. հոգեբանական բաղադրիչը շատ կարևոր է: Ես ունեմ կին, տղա, մոտ 7 տարի առաջ կյանքս քաոս էր, հետո՝ կենտրոն գալուց հետո, սկսեցի նորմալ կյանքով ապրել, դադարեցի օգտագործելը: Ես շինարար եմ: Հիմա հանգիստ ապրում եմ:
Կախվածությունը հիվանդություն է, ինչպես, օրինակ, տուբերկուլոզը, դիաբետը և այլ հիվանդություններ»,- ասաց Վլադիմիրը:
Ռոստովից Դարիան 3 տարի է, ինչ թմրամիջոց չի օգտագործում: 19 տարեկանից միություն է եկել: Այնտեղ հիմնական նպատակը թմրամիջոցների օգտագործման դադարեցումն է: «Ես ուզում եմ ասել, որ կա նոր կյանքի ճանապարհ: Պետք է այս կենտրոն գալ՝ անկախ դավանանքից, սեռական կողմնորոշումից: Կարևորը՝ դադարեցրեք թմրամիջոց օգտագործելը»,- ասաց նա:
«Առաջին լրատվական»-ի հետ զրույցում ԱՀԹ «Ցերեկային կենտրոնի» տնօրեն տեր Գրիգոր քահանա Գրիգորյանը ընդգծեց, որ կենտրոն 70 թմրամոլ է հաճախում, որոնցից 15-ը լիարժեք ձերբազատվել է կախվածությունից:
«Կենտրոնը շահառուներին տրամադրում է տարբեր ծառայություններ՝ հովվական խնամք, հոգեբանական և սոցիալական աջակցություն, խորհրդատվություն՝ նպատակ ունենալով նվազեցնել ներքին հոգեբանական լարվածությունը»,- ասաց նա՝ հավելելով, որ շատ կարևոր է նաև թմրամիջոց օգտագործողի ընտանիքի անդամների հետ տարվող աշխատանքը, քանի որ նրանք, որպես կանոն, ավելի վատ հոգեվիճակում են գտնվում:
Հասարակության անդամներին քահանան հորդորեց անտարբերությամբ, արհամարհանքով չվերաբերվել թմրամիջոցից կախվածության մեջ գտնվող մարդկանց, քանի որ այդ կերպ նրանց ագրեսիվ են դարձնում:
Նշենք նաև, որ մեզ հետ զրույցում ՀՀ ԱՆ նարկոլոգիական կլինիկայի փոխտնօրեն Ասյա Գրիգորյանն ասաց, որ կլինիկայում փոխարինող բուժում է ստանում 240 հիվանդ: Ըստ նրա՝ թմրամոլների թվի աճ կա, ընդ որում՝ աճել են ներերակային ճանապարհով թմրամիջոց օգտագործելու դեպքերը:
Առավել մանրամասն՝ տեսանյութում:
