«Պետք է հիասթափեցնեմ ձեզ, որ առաջիկայում ոչ մի հեղինակավոր և պատմամշակութային նշանակության շենք չի քանդվելու»,- այսօր ամփոփելով իր պաշտոնավարման 100 օրը՝ հայտարարեց քաղաքաշինության նախարար Նարեկ Սարգսյանը:
Նա անդրադարձավ քաղաքում մի շարք այլ շինությունների կառուցման ու կիսատ թողնված շինությունների ճակատագրերին: «Հին Երևան» նախագծի հաստատումից հետո, նախարարի խոսքով, առաջինը ձեռնամուխ կլինեն Աֆրիկյանների շենքի վերականգնմանը, ապա մնացած ծրագրերին:
Ինչ վերաբերում է Հյուսիսային պողոտայի շինարարությանը, ապա նախարարի խոսքով՝ այն կավարտվի հոկտեմբեր ամսին: Շինարարության ավարտից հետո պողոտան բոլորովին այլ տեսք կունենա: Թփերի փոխարեն կլինեն ծառեր, լուսավորությունը կփոխվի: Նախատեսվում է մեծ ծաղկամանների տեղադրում, պատերի կանաչապատում, որը նոր տեխնոլոգիա է, ինչպես նաև մի քանի հեղինակավոր քանդակների տեղադրում:
Ինչ վերաբերում է բազմաթիվ ճարտարապետների կողմից հնչող մտահոգություններին՝ կապված «Զվարթնոց» համալիրի քանդման հետ, Նարեկ Սարգսյանը վստահեցրեց, որ «Զվարթնոցի» համալիրի քանդման հարց այս պահին դրված չէ: «Այս պահին քաղաքապետարանի ճարտարապետական կառույցի աշխատակիցների հետ ստեղծվել է աշխատանքային խումբ, որը կուսումնասիրի շենքի բազրիքների քանդման հարցը: Բայց այս պահին օդանավակայանի շենքի քանդման խնդիր չկա»,- ասաց Սարգսյանը:
Ինչ վերաբերում է քաղաքում առկա մյուս կիսակառույցներին, Դվին, Սևան հյուրանոցների շենքերին, Երիտասարդական պալատին և մի քանի այլ շենքերի, ապա նախարարն ասաց, որ կիսակառույցների մասով դեռ ոչ մի ծրագիր չունեն: «Բայց ես ամենայն պատասխանատվությամբ կարող եմ ասել, որ մենք հետևողական ենք, որ կիսակառույցների հարցը լուծվի: Ինչ վերաբերում է Երիտասարդական պալատին, ապա փաստ է, որ շենքը չի կառուցվում: Նախագիծը, որը մրցույթով շահել էր այդ ընկերությունը, ես գոնե, որպես նախարար և ճարտարապետ, շատ ոգևորվածների մեջ չեմ, որ նախագիծն այդ տեսքով կառուցվեր: Իսկ չի կառուցվում, քանի որ դա կապված է ներդրողի ֆինանսական հնարավորությունների հետ: Շատ մեծ կառույց, բնակելի հյուրանոցային համալիր, բավական ամբիցիոզ նախագիծ, որը կառուցելու համար հսկայական ֆինանսական միջոցներ էին անհրաժեշտ: Նախագիծը եղավ, մրցույթը եղավ, շահողը եղավ, բայց ֆինանսավորող չկա»,- ասաց քաղաքաշինության նախարարը:
Վերջինս նաև նշեց, որ շինարարական տենդերների գործընթացն առավել թափանցիկ դարձնելու համար առաջիկայում կստեղծվի փորձագիտական պետական կենտրոն: «Խնդիրն այն է, որ շուկայական գնագոյացումը և այն նորմերը, որոնք այսօր կան, միմյանց չեն համապատասխանում, և Վերահսկիչ պալատը բազմաթիվ քննարկումներ արեց: Այդ դաշտը մենք պետք է կարգավորենք, որպեսզի շինարարական տենդերներին մասնակցեն պատշաճ շինարարական կազմակերպություններ»,- ասաց Նարեկ Սարգսյանը՝ հավելելով, որ այդ ուղղությամբ տեղի կունենա նաև տենդերների չափորոշիչների որոշակի խստացում:
