ԱՄՆ կառավարական մասնագետները, որոնք էներգամատակարարման սահմանափակման կամ նույնիսկ դադարեցման պայմաններում առաջացած արտակարգ իրավիճակներում աշխատանքի փորձ ունեն, կմիանան Ուկրաինայի կառավարության ճգնաժամային էներգետիկ շտաբի աշխատանքին, որն ստեղծվել է Ուկրաինային ռուսական գազի մատակարարումների դադարեցման կապակցությամբ։
Ինչպես հինգշաբթի հաղորդում է Ուկրաինայի ռեգիոնի նախարարության մամլո ծառայությունը, նման պայմանավորվածության են հասել Ուկրաինայի փոխվարչապետ Վլադիմիր Գրոյսմանը և ԱՄՆ անվտանգության, ենթակառուցվածքի և էներգետիկ վերականգնման նախարարի տեղակալ Ուիլյամ Բրայանը։
Հանդիպման մասնակիցները համակարծիք են եղել, որ ամենագլխավոր ասպեկտը, որի վրա անհրաժեշտ է կենտրոնացնել համատեղ ջանքերը, Ուկրաինայի կողմից աշուն-ձմեռ ժամանակահատվածը ռուսական գազի մատակարարումների դադարեցման պայմաններում անցկացնելն է և հատկապե այդ հարցի լուծումն արևելյան մարզերում, որտեղ տեղի է ունենում ուժային հատուկ գործողություն, և չեն դադարում մարտական գործողությունները։
«Իմ թիմի խնդիրն է ձեզ օգնել այս ձմեռ։ Մեր խնդիրները շատ լուրջ են։ Մենք մշակում ենք տեխնոլոգիաներ, պրոցեդուրաներ, գործիքներ և ծրագրում ենք էներգամատակարարման դադարեցման պայմաններում արտակարգ իրավիճակների նախապատրաստման մոդելներ։ Հուսով եմ, որ այդ փորձը կօգնի Ուկրաինային»,- նշել է Բրայանը։ Նրա խոսքերով՝ փորձագիտական խմբի կազմը ձևավորվելու է մոտակա ժամանակներս։