«Վերահսկիչ պալատի հայտնաբերած խախտումները ո՛չ յուրացում են, ո՛չ չարաշահում». լրագրողների հետ հանդիպմանը ասաց ԼՂՀ մշակույթի և երիտասարդության հարցերի նախարար Նարինե Աղաբալյանը՝ հավելելով, որ կարող է թվարկել, թե ինչ խախտումների մասին է խոսքը, որոնք, ըստ էության, անհրաժեշտություն են ղել, քանի որ դրանք կապված են աշխատակիցների պարգևատրումների, հյուրանոցային ծախսերի գերազանցման հետ:
«Կառավարության սահմանած հյուրանոցային ծախսերի և շուկայականի միջև տարբերություն կա, ուստի երբեմն սահմանված չափը՝ 20.000 դրամը, գերազանցվում է: Իհարկե, ունեցել ենք դեպքեր, երբ 5.000 դրամ ենք վճարել մեկ օրվա համար: Միշտ չէ, որ հնարավոր է պահպանել կառավարության սահմանած շեմը»,- մանրամասնեց նա՝ հավելելով, որ մշակույթի ոլորտում միշտ չես կարող պլանավորված շարժվել, քանի որ կան նաև շուկայական գներ և անկանխատեսելի իրավիճակներ: Բացի դրանից՝ չի սխալվում նա, ով չի աշխատում:
ԼՂՀ մշակույթի նախարարը, ի պատասխան «Առաջին լրատվական»-ի՝ մշակութային քաղաքականության, ԼՂՀ մշակութային դիմագծի վերաբերյալ հարցերին, կամ արդյոք ԼՂՀ-ն, բացի հիմնախնդրից, ինչո՞վ է հայտնի աշխարհին, ընդգծեց, որ Շուշիում բացվել է գորգերի թանգարանը. թեև իրենից մասնավոր հավաքածու է ներկայացնում, սակայն գործում է պետական աջակցությամբ:
«Արցախի պատմաերկրագիտական թանգարանում մենք անընդհատ համալրում ենք մեր գորգերի հավաքածուն և պատրաստվում ենք նաև գիտական ուսումնասիրություններ հրատարակել արցախյան գորգերի վերաբերյալ: Դա արվում է գորգագործության վերականգնմանը զուգընթաց: Այսինքն՝ գործում ենք տարբեր ուղղություններով»,- ի պատասխան՝ ասաց նա՝ որպես մշակութային կարևոր քայլ ներկայացնելով նաև այն, որ արցախյան գորգարվեստի մրցույթ է հայտարարվել, որպեսզի ճանաչելի դարձվի արցախյան գորգը, քանի որ բնակիչներից շատերը չեն էլ ճանաչում, թե որն է արցախյան գորգը:
Ըստ ԼՂՀ մշակույթի նախարարի՝ մշակութային նշանկություն ունի նաև Տոհմածառի մրցույթը: Պայման է դրվել 150 տարվա կտրվածքով ներկայացնել սեփական տոհմածառը: «Եթե հարցնեք, թերևս քչերը կարող են հիշել իրենց տատ ու պապի, ծնողների անուն-ազգանունները կամ որևէ տվյալ: Դրա համար մենք մտածել ենք իրականացնել այս ծրագիրը, որպեսզի մատաղ սերնդի ուշադրությունը հրավիրենք իրենց նախնիների վրա»,- շեշտեց նախարարը:
Նարինե Աղաբալյանը նաև տեղեկացրեց, որ Գանձասարի վանական համալիրում կբացվի Մատենադարանի մասնաճյուղը: Մատենադարանից կփոխանցվեն այն ձեռագրերի կրկնօրինակները, որոշ դեպքերում՝ նաև բնօրինակները, որոնք պահպանվել են Ղարաբաղում և ժամանակին փոխանցվել Երևանի Մատենադարանին:
Առավել մանրամասն՝ տեսանյութում: