Դատական ակտերի հարկադիր կատարման ծառայության առաջարկով և կառավարության որոշմամբ այսօր Կարեն Դեմիրճյանի անվան մարզահամերգային համալիրը հանձնվեց պաշտպանության նախարարությանը՝ գույք պարտքի դիմաց կառավարության միջոցառումների շրջանակում: Այդ որոշման նախագիծն այսօր կառավարության նիստի ժամանակ ներկայացրել է ֆինանսների փոխնախարար Պավել Սաֆարյանը:
«Կ.Դեմիրճյանի անվան մարզահամերգային համալիր» ՓԲԸ-ի՝ կառավարության նկատմամբ վարկային պարտքի, ինչպես նաև մի շարք այլ պարտքերի դիմաց ԴԱՀԿ-ի կողմից առաջարկվել է, որ այդ պարտքի դիմաց ֆինանսների նախարարության կողմից գույքը ընդունվի, գրանցվի սեփականության իրավունքը և փոխանցվի պաշտպանության նախարարության հաշվեկշռին»,- ասել է փոխնախարարը:
Հիշեցնենք, որ համալիրի վարկային պարտքը կազմում է 10 մլրդ 207 մլն դրամ, սակայն, Սաֆարյանը նշել է, որ դրանից բացի առկա են նաև այլ պարտքեր՝ 204 մլն դրամ պետական տուրք:
«Մարզահամերգային համալիր» ՓԲԸ-ի խոսնակ Կորյուն Գրիգորյանի խոսքով՝ կառավարության այսօրվա որոշումը միայն մի նպատակ է հետապնդում՝ կորցնել նախկին գործարքների հետքը: «Նախկին գործարքը, որը արել էին և ծայրից ծայր սխալ էր, ինչպես նաև բյուջեից 25 միլիոն գումար բաց թողնելը և մի շարք այլ հարցեր, հիմք է տալիս եզրակացնելու, որ այսօրվա որոշմամբ փորձ արվեց մի նոր իրավիճակ ստեղծել, որը կապ չի ունենա մյուսների հետ, և դրանով կկորչի մյուսների հետքը, քանի որ նախորդների հիմքի վրա իրենք ոչ մի բան չէին կարողանում անել: Ինչ անում էին, փակուղի էին մտնում, և ամեն ինչ անօրինական է: Չնայած որ այսօրվա որոշումն էլ է անօրինական, քանի որ այս տարբերակով հարց չի լուծվում»,- «Առաջին լրատվական»,-ի հետ զրույցում ասաց Գրիգորյանը:
Վերջինս շարունակեց պնդել, որ համալիրի շենքը երբեք էլ ՊՆ-ի հաշվեկշռում չի եղել, ինչպես խոսվում էր ի սկզբանե: «Երբեք էլ շենքը նրանց հաշվեկշռում չի եղել: Հենց դա է խնդիրը: Մենք երբեք շենքն այնտեղ չենք գրավադրել: Շենքը ոչ մի կապ չունի ՊՆ-ի հետ: Բայց սա ամենալավ տարբերակն է մութ, փակ գործարքներ կատարելու համար: Հիմա մենք ինչ քայլեր փորձենք անել ՊՆ-ի հետ՝ բախվելու ենք փակ դռների»:
Կառավարության որոշումը ենթադրում է, որ համալիրն այլևս աճուրդի չի հանվելու, գնորդ չի փնտրվելու: Այն, Գրիգորյանի խոսքով, կմնա ՊՆ-ի հաշվեկշռում այնքան, մինչև իրենք գումարը կվճարեն. «Կմնա այնքան, մինչև մենք կվճարենք գումարը: Պարզապես այդտեղ ուրիշ նրբություններ կան, և մենք դեռ չենք հասցրել ծանոթանալ»:
Համալիրի փաստաբան Արմինե Հակոբյանն իր հերթին ասաց, որ կառավարությունը չէր կարող նման որոշում կայացնել, քանի որ համալիրի շենքի հետ կապված մի քանի հայց կա դատարանում, և միջդատական փուլում նման որոշում չէր կարող կայացվել: Պետք է սպասեին մինչև դատարանի որոշումների կայացվելը:
Փաստաբանը դժվարացավ ասել՝ կբողոքարկե՞ն կառավարության որոշումը, թե՞ ոչ՝ պատճառաբանելով, որ դեռ ամբողջությամբ ծանոթ չեն կառավարության որոշմանը: Կծանոթանան, կքննարկեն ու նոր կորոշեն հետագա անելիքները: