Օգոստոսի 13-ին ՕԵԿ-ի և Ագրարային համալսարանի հարևանությամբ գտնվող վիճահարույց տարածքի բակում երկու կողմերի ակտիվիստների քաշքշուկի և ԱԺ պատգամավոր Հեղինե Բիշարյանի ու Հովհաննես Մարգարյանի ստացած վնասվածքների փաստի առիթով ոստիկանության Կենտրոնականի բաժնում ՕԵԿ-ի բողոքի հիման վրա նյութեր են նախապատրաստվում: Այդ մասին «Առաջին լրատվական»-ին փոխանցեցին ոստիկանության լրատվական ծառայությունից:
Հիշեցնենք, որ այդ օրը նշված տարածքում քաշքշուկ էր սկսվել ՕԵԿ-ի համակիրների և Ագրարային համալսարանի ուսանողների միջև: Վերջիններս համալսարանի ղեկավարության հետ կուսակցությունից պահանջում էին հեռացնել իրենց ցանկապատը նշված տարածքից: Երբ այդ պահանջը ինքնակամ չկատարվեց, ուսանողները փորձեցին այն ուժով հեռացնել, իսկ այդ պահին տարածքում էին ԱԺ ՕԵԿ-ական պատգամավորներ Հեղինե Բիշարյանն ու Հովհաննես Մարգարյանը: Ցանկապատը քիչ էր մնացել ընկներ Բիշարյանի գլխին, իսկ Հովհաննես Մարգարյանը մեջքի շրջանում վնասվածքներ էր ստացել:
«Քիչ էր մնում՝ ցանկապատն իմ գլխին գցեին: Պետք է քրեական գործ հարուցվի նրանց դեմ՝ խուլիգանության համար»,- հայտարարել էր Բիշարյանը:
Ընդ որում՝ որոշ տեղեկություններով, նա առաջիկայում պետք է մեկնի արտասահման, քանի որ այստեղ ստացած բուժումը բավարար չի եղել:
Այս օրերին տարածքի հետ կապված վեճը կարծես թե հանդարտվել է: Չնայած նույն օրը Ագրարային համալսարանի պրոֆեսորադասախոսական կազմն ու ուսանողները հայտարարում էին, որ եթե ՕԵԿ-ականները շարունակեն շինարարությունը, ապա իրենք սեպտեմբերի 1-ին հողին կհավասարեցնեն շինությունը, քանի որ այդ տարածքում իրենք պետք է կանգնեցնեն Համաշխարհային բանկի օժանդակությանբ ստացած գյուղտեխնիկան: