Ռուսաստանի վարչապետ Դմիտրի Մեդվեդևի Twitter-ի կայքէջը կոտրած ցանցահենները` «Անանուն ինտերնացիոնալ»-ից, կոչ են անում չօգտվել iPhone-ից: Հենց այդ հեռախոսի միջոցով են նրանք հասանելիություն ստացել նրա` Facebook-ի, Twitter-ի և Vkontakte-ի էջերին, գրում է Izvestia-ն:
«Մի օգտվեք iPhone-ից: Այսինքն՝ օգտվել կարելի է, սակայն այնտեղ անձնական տեղեկություն պահպանել՝ ոչ»,-նախազգուշացրել են նրանք:
Ցանցահենները հստակեցրել են, որ Twitter-ը կոտրված չի եղել, «այնտեղ ուղղակի ճիշտ գաղտնաբառն է հավաքվել»: Նրանց խոսքով` Մեդվեդևի գաղտնաբառը 15 նիշից է բաղկացած եղել` gfkrtopmda68743:
Ցանցահենների խոսքերով` իրենք կարողացել են հասանելիություն ստանալ նաև Մեդվեդևի՝ Facebook-ում և Vkontakte-ում էջերի նկատմամբ, սակայն որոշել են «խաղադրույք անել» միայն Twitter-ը կոտրելու վրա: