Դամասկոսն ԱՄՆ-ին զգուշացնում է Սիրիայի տարածքում «Իսլամական պետության» բազաների ուղղությամբ հարվածելու հարցում: Այս մասին հայտնում է SANA տեղեկատվական գործակալությունը:
«Ցանկացած միակողմանի ակցիա, որը դուրս կլինի Անվտանգության խորհրդի 2170 բանաձևի շրջանակներից, կդիտվի որպես անկախ պետության դեմ ագրեսիա»,- հայտարարել է Սիրիայի ԱԳՆ ղեկավարի տեղակալ Ֆեյսալ Մեքդադը:
ԱՄՆ-ը, զգուշացրել է սիրիացի դիվանագետը, լավ կլինի՝ «խուսափի միջազգային հանրության որոշումները որպես քողարկում օգտագործելուց՝ այլ երկրների ներքին գործերին միջամտելու համար»:
ՄԱԿ-ի ԱԽ օգոստոսի 15-ին ընդունած բանաձևը հիմք է տալիս Իրաքում և Սիրիայում «Իսլամական պետություն» և «Ջեբհաթ ան-Նուսրա» ահաբեկչական կազմակերպությունների կողմից առաջացած սպառնալիքին կոլեկտիվ միջազգային արձագանքնման համար և նախատեսում է նրանց գործունեության հետ կապված 6 անձանց նկատմամբ պատժամիջոցների սահմանում:
«Մենք պատրաստ ենք միջազգային հանրության բանաձևերին համապատասխան համագործակցության»,- ասել է Մեքդադը:
«Միացյալ Նահանգների հանդեպ վստահություն չի լինի, մինչև նրանք իրենց գործընկերներին, և առաջին հերթին՝ Թուրքիային, չստիպեն դադարեցնել «Իսլամական պետության» զինյալներին աջակցել, որոնց Անկարան թույլ է տալիս ազատորեն տեղաշարժվել սահմանով, փող, զենք և մարզական ճամբարներ է տրամադրում»,- ասել է նա: