Վրաստանի վարչապետ Իրակլի Ղարիբաշվիլին վաղը մեկօրյա պաշտոնական այցով կժամանի Հայաստան: Այցի շրջանակներում սպասվում է, որ Ղարիբաշվիլին կհանդիպի նախագահ Սերժ Սարգսյանի, ինչպես նաև վարչապետ Հովիկ Աբրահամյանի հետ, որից հետո ընդլայնված կազմով կհանդիպեն երկու երկրների կառավարությունների ներկայացուցիչները:
Վրացական պատվիրակության կազմում ընդգրկված են արտաքին գործերի, էկոնոմիկայի, էներգետիկայի, կայուն զարգացման նախարարները, պատգամավոր Ռուսլան Պողոսյանը, կառավարության աշխատակազմի փոխղեկավար Նինո Կոբախիձեն ու անվտանգության խորհրդի և ճգնաժամի կառավարման նախագահ Մինդիա Ջանելիձեն:
Ջավախքի շրջանային ժողովի պատգամավոր Ֆյոդոր Թորոսյանը կարծում է, որ այս հանդիպումը բավական արդյունավետ կարող է լինել, քանի որ քննարկման սեղանին է դրվելու հիմնականում միջպետական հարաբերությունների հարցը, քանի որ հայտնի է, որ Հայաստանն ու Վրաստանը երկու տարբեր կառույցների են անդամագրվելու, ինչը լրացուցիչ խնդիրներ է ենթադրում: «Այս տեսանկյունից՝ շատ լուրջ խնդիրներ կան փոխադարձ հարաբերությունների առումով, և այդ խնդիրների լուծման բանալին գտնվում է երկու պետության ղեկավարների ձեռքում: Ես չեմ կարծում, որ այսքան ժամանակ լավ հարաբերություններ, միասնական սահման ունեցած պետությունները կարող են վատացնել իրենց հարաբերությունները տարբեր կառույցների անդամագրվելու պատճառով: Խելացի գտնվելու պարագայում հայաստանցիները կարող են օգտվել Վրաստանին Եվրոպայի տված ազատություններից, Վրաստանն էլ՝ Մաքսային միության: Բայց քննարկելու հարցեր իսկապես որ կան»,-«Առաջին լրատվական»-ի հետ զրույցում ասաց Թորոսյանը:
Հարց է, օրինակ, Վրաստանի հետ վիզային ռեժիմի խնդիրը: Ըստ մեր զրուցակցի՝ «սա պետք է շատ լուրջ քննարկման առարկա դառնա: Ես կարծում եմ, որ սկզբնական շրջանում հեշտացված ռեժիմ պետք է լինի ջավախահայության և ընդհանրապես Վրաստանում ապրող հայերի համար: Բայց թե հետո ի՞նչ խնդիրներ կառաջանան, և ինչ ճնշումներ կգործադրվեն Ռուսաստանի և Արևմուտքի կողմից՝ հետագան ցույց կտա: Իսկ հիմա, որպեսզի ժողովրդի վրդովմունքը չառաջացնեն, պետք է որ խելամիտ վարվեն և վիզային ռեժիմի հետ խնդիրներ չառաջացնեն»:
Պատգամավորի խոսքով՝ երկու երկրների ղեկավարների հետ հանդիպման ժամանակ անպայման պետք է քննարկման առարկա դառնա նաև Ջավախքում տեղակայվող ռազմաբազայի հարցը, որի ուղղությամբ արդեն աշխատանքներ են տարվում: «Սա մի քիչ ցավոտ հարց է ջավախահայության համար, և լավ կլիներ, որ այս խնդիրն էլ քննարկվեր ամենայն լրջությամբ: Այնպես որ երկու երկրների ղեկավարները, պաշտոնյաները ամբիցիոզ տրամադրությունները պետք է մի կողմ դնեն, շատ չլսեն իրենց վերևներին, որոնք այս երկու փոքր պետություններին ներքաշել են այս տարակուսանքի մեջ՝ Եվրամիություն, Մաքսային միություն, որի վերջը ոչ ոք չգիտի: Բայց քանի որ մենք այլընտրանք չունենք, ապա պետք է խուսանավենք ստեղծված վիճակում և պահպանենք մեր երկու երկրների բարիդրացիական հարաբերությունները»,- ասաց Թորոսյանը: