Հելսինկիում պահակներն անցած հանգստյան օրերին անցկացված «Ուիքենդ» երաժշտական փառատոնից հետո աղբի կողքին մոտ 12 000 եվրո են գտել: Այս մասին հայտնում է ITAR-TASS-ը՝ հղում անելով «Էթելյա-սուոմեն սանոմաթ» թերթին:
Կիրակի գիշերը 2 պահակ շրջել են տարածքով, որտեղ անցկացվել է փառատոնը: Նրանց պարտականությունների մեջ է մտնում ստուգել՝ արդյոք մասնակիցների թողած աղբի մեջ մոռացված անձնական իրեր չե՞ն մնացել:
Աղբի կոնտեյներներից մեկում նրանք գտել են փողով լի պայուսակը՝ թղթադրամներով ու մետաղադրամներով: Պայուսակը պատկանել է ձեռնարկատերերից մեկին, որը մասնակցել է փառատոնին:
«Մենք չկարողացանք այդ ամենը ինքնուրույն հաշվել, բայց պայուսակում ստացական կար, որում նշված էր նաև տիրոջ անունը: Այդպես էլ կարողացանք գտնել նրան»,- պատմել է պահակներից մեկը:
Պարբերականի տվյալներով՝ փառատոնի ուշադիր աշխատողներին պարգևատրում է սպասվում: