«Խաղաղությունը հաստատվել է օգոստոսի 5-ին, մեր գործողություններից հետո»,- ԼՂՀ-ում լրագրողների հետ հանդիպմանը ասաց ԼՂՀ պաշտպանության նախարար Մովսես Հակոբյանը՝ պատասխանելով լրագրողների այն հարցադրմանը, թե արդյոք Սոչիում կայացած եռակողմ հանդիպումից հետո՞ սահմանին իրավիճակը խաղաղվեց: «Իրենց ստորաբաժանումները հրաժարվել են, ամսի 2-3-ին մեկ-երկու կորստով հետ են նահանջել՝ վերադասին տեղեկացնելով, որ հնարավոր չէ, խնդիրներ մի՛ դրեք մեր առջև: Ամսի 5-ից հրադադար են հայտարարել: Իհարկե, նախագահների հանդիպումը ինչ-որ բան արել է, բայց մենք որևէ ցուցում չենք ստացել»,- ասաց նա:
Մովսես Հակոբյանը նաև ընդգծեց, որ Ադրբեջանը ուզում էր, որ հայկական կողմը հայտարարի մոբիլիզացիա, իսկ եթե հայտարարվեր, մեր տնտեսությունը մոտ մի տարի հետ կընկներ: Ըստ նրա՝ հակառակորդը փորձել է հոգեբանական ազդեցություն գործել թե՛ զինվորի և թե՛ հասարակության վրա, սակայն չի հաջողվել, նրանց ավիացիան հետ է քաշվել, տանկային ստորաբաժանումները՝ նույնպես:
Լարված օրերին հայկական կողմը ունեցել է 6 զոհ, հակառակորդը՝ 36: Արցախի ՊԲ հրամանատարն ասաց, որ հակառակորդի զոհերին կարող է անուն-ազգանուններով թվարկել:
Պատասխանելով «Առաջին լրատվական»-ի հարցին՝ ԵԱՀԿ Մինսկի խումբը վերջին շրջանում արդյոք մոնիթորինգներ անցկացնո՞ւմ է հրադադարի ռեժիմի խախտման հետ կապված, թե՞ ոչ, կամ Մինսկի խումբը արդյոք ակտի՞վ է այս գործընթացում, ասաց. «Բարձր եմ գնահատում Մինսկի խմբի գործունեությունը, ուղղված է կայուն և երկարատեւ խաղաղության հաստատմանը: Ամսի 2-ին մոնիտորինգ էր Մարտունիում, բայց դա ի՞նչ է տվել մեզ, եթե իմանալով՝ Մարտակերտի ուղղությամբ անցան հարձակման»:
Առավել մանրամասն՝ երեկոյան տեսանյութում:
Լուսանկարը՝ Mediamax-ի