Կառավարությունը վաղը կայանալիք նիստում «Նատալի ֆարմ» սահմանափակ պատասխանատվությամբ ընկերությանը թմրամիջոցների և հոգեմետ նյութերի և ՀՀ կառավարության կողմից սահմանված՝ դրանց պրեկուրսորների արտահանման, ներմուծման և մեծածախ առևտրի գործունեության իրականացման լիցենզիա տալու մասին որոշում է կայացնելու: Այդ մասին նշված է կառավարության նիստի օրակարգում: Հայտնի է, որ «Նատալի ֆարմ» ընկերությունը պատկանում է Ազգային ժողովի պատգամավոր և խոշոր գործարար Սամվել Ալեքսանյանին:
Իսկ ընդամենը մեկ ամիս առաջ կառավարությունը ևս մեկ նմանատիպ որոշում կայացրեց և գրեթե նույն լիազորությունները տվեց դեղի ներկրման և իրացման շուկայում մեկ այլ խոշոր՝ «Ալֆա-ֆարմ» ընկերությանը: Մամուլի հրապարակումների համաձայն՝ «Ալֆա-ֆարմ» ընկերությունը պատկանում է ՀՀ նախկին նախագահ Ռոբերտ Քոչարյանի կնոջը` Բելլա Քոչարյանին: Ընդ որում՝ ինչպես «Ալֆա-ֆարմին» լիցենզիա տրամադրելու որոշումն է կառավարության նիստում ներկայացրել առողջապահության նախարար Արմեն Մուրադյանը, այդպես էլ վաղը նա ներկայացնելու է «Նատալի ֆարմի» հետ կապված որոշումը: Եվ մամուլի նույն հրապարակումների համաձայն՝ Ա. Մուրադյանը Քոչարյանների դստեր` Արմինե Քոչարյանի քավորն է:
Հիշեցնենք, որ 2000-ական թվականներին՝ Ռ.Քոչարյանի օրոք, մոնոպոլիզացվեց դեղերի ներկրման և իրացման շուկան: Այդ ժամանակ իշխանությունները հասկացան, որ դա լայն սպառման ապրանք է և կարող է իրենց գերշահույթներ ապահովել: Եվ իշխանությունները ոլորտում օրենսդրական և այլ փոփոխությունների արդյունքում՝ դեղերի շուկան կենտրոնացրեցին իրենց ձեռքում: Արդյունքում բազմաթիվ դեղ-ներկրողներ և իրացնողներ սննկացան և արհեստականորեն շուկայից դուրս մղվեցին՝ չկարողանալով դիմանալ ոչ արտոնյալ մրցակցությանը: Ավելի ուշ դեղերի շուկան բաժանվեց երկու մասի: Մի մասը կենտրոնացվեց Ս. Ալեքսանյանի, մյուս մասը, ինչպես մամուլն է նշում, Բ. Քոչարյանի ձեռքում:
Եվ ահա այսօր էլ ՀՀ կառավարությունը դեղերի շուկայում այդ երկու հզոր սեփականատերերին պատկանող ընկերություններին թմրամիջոցների և հոգեմետ նյութերի ներկրման ու իրացման լիցենզիաներ է տրամադրում: