Ամերիկացի լրագրող Ջեյմս Ֆոուլի հարազատները հաստատել են նրա մահվան փաստը:
«Մենք երբեք Ջիմով այնքան չենք հպարտացել, որքան հիմա: Նա կյանքը տվեց, որպեսզի աշխարհին պատմի սիրիական ժողովրդի տառապանքների մասին»,- ասել է Ֆոուլի մայրը, որի խոսքերն է մեջ բերում ITAR-Tass գործակալությունը:
Իր ամբողջ ընտանիքի անունից նա խնդրել է «առևանգողներին՝ պահպանել մնացած գերիների կյանքը»:
«Ինչպես Ջիմը՝ նրանք ոչ մի բանում մեղավոր չեն: Նրանք չեն վերահսկում ամերիկյան իշխանությունների քաղաքականությունը Իրաքում, Սիրիայում կամ էլ աշխարհի այլ հատվածում»,- հավելել է նա:
Ամերիկյան իշխանությունների ներկայացուցիչները, իրենց հերթին, նշել են, որ համացանցում հայտնված տեսանյութում, ամենայն հավանականությամբ, Ֆոուլիի մահապատիժն է: Նրանք հավելել են, որ չորեքշաբթի Բարաք Օբաման պետք է այդ դեպքի կապակցությամբ հատուկ հայտարարությամբ հանդես գա:
Ավելի վաղ հայտնի էր դարձել, որ «Իսլամական պետություն» խմբավորումը տեսանյութ էր տարածել, որում պատկերված է ամերիկացի լրագրող Ջեյմս Ֆոուլի մահապատիժը, որն անհետացել էր Սիրիայում 2012թ. նոյեմբերի 22-ին: Տեսանյութում պատկերված է նաև լրագրող Սթիվեն Սոթլոֆը, որն անհետացել էր Լիբանանում 2013թ. օգոստոսին:
