«Հրապարակ» թերթը գրում է. «Օգոստոսի 1-ին, իր պաշտոնավարման 100 օրվա կապակցությամբ, առողջապահության նախարար Արմեն Մուրադյանը հպարտորեն հայտարարեց, որ հուլիսի 1-ից բարձրացել են բժիշկների և բուժքույրերի աշխատավարձերը, իսկ Հ1-ի եթերում էլ վերջերս գլուխ էր գովում, որ բուժքույրերի աշխատավարձը 10 տոկոսով բարձրացել է: Բայց երբ բուժհաստատությունները հաշվարկներ կատարեցին, պարզվեց, որ աշխատավարձի բարձրացումն ուղղակի փուչիկ է, որը պայթեց հատկապեց մարզային պոլիկլինիկաներում և դժգոհության ալիք առաջացրեց ամբուլատոր աշխատողների, բուժքույրերի, ընտանեկան բժիշկների շրջանում: Աշխատանք կորցնելու վտանգի առաջ նրանցից քչերն են հանդգնում խոսել այս մասին, այն էլ լրագրողների հետ:
Երեկ մեզ հետ կապվեցին Կապանի բժշկական կենտրոնի աշխատակիցները և պատմեցին, որ ավելի քան 45 հազար բնակիչ սպասարկող այս հաստատությունում և հատկապես դրան կից գործող տարածքային պոլիկլինիկայում լարված իրավիճակ է: Բուժքույրերի և բժիշկների աշխատավարձը կրճատել են: Նախկին 48 հազարի փոխարեն մի քանի ամիս նրանք ստացել են 30 հազար: Պոլիկլինիկայի աշխատակիցները գանգատվում էին, որ տնօրենը` Սմբատ Օրբելյանը, որը, ի դեպ, առողջապահության նախկին փոխնախարար Արամ Օրբելյանի հայրն է, ստիպում է բուժքույրերին նոր պայմանագրեր ստորագրել, որոնց մեջ իրենց աշխատավարձը նշվում է 30 հազարի չափ: Մարդիկ դժգոհում էին նաև տնօրենի կոպիտ պահվածքից, իրենց կենդանիների անուններ տալուց: «Մեզ ասում է՝ ոչխար, անասուն, դա բոլորը գիտեն»,- բողոքում էին կանայք, որոնք վստահ էին, որ նախարարը չգիտի, թե ինչ «օյին է բերում» տնօրենն իրենց գխին, և ցանկանում էին մեր միջոցով հայտնել այս ամենի մասին: «Ես ձեզ տղամարդու պես ասում եմ, չի եղել նման բան, եթե պետք է՝ երդվեմ, Ավետարան բերեմ: Չի համապատասխանում իրականությանը»,- հերքեց Սմբատ Օրբելյանը, որի հետ զրույցից այնքան տագնապալի վիճակ ուրվագծվեց, որ էթիկական խնդիրը երկրորդական թվաց: Սմբատ Օրբելյանը չժխտեց, որ իր աշխատակիցների աշխատավարձերը նվազել են, բացատրելով սա խաղի նոր կանոններով, այսինքն նրանով, որ փոխվել է ֆինանսավորման ձևը՝ պայմանավորված սպասարկվող բնակչության թվի կրճատմամբ:
Մանրամասները՝ թերթի այսօրվա համարում
