«Հրապարակ» թերթը զրուցել է ԲՀԿ-ական տնտեսագետ պատգամավոր Միքայել Մելքումյանի հետ:
– Պարոն Մելքումյան, Դուք էիք զբաղվում էլեկտրաէներգիայի թանկացման հարցով, հայտարարություն տարածեցիք, որը չընդունեց ՀԾԿ հանձնաժողովը: Ի՞նչ եք արել այս ընթացքում, հանդիպե՞լ եք հանձնաժողովի հետ, պայքարն արդյունք տվե՞լ է:
– Մենք չենք հանդիպել, բայց ես ասեմ, որ էլեկտրաէներգիայի վերաբերյալ քառյակի հայտարարությունն ուժի մեջ է, և այն կետերը, որ քառյակը հարցադրումներ արել է մինչև սեպտեմբերի վերջ, նրա բաղկացուցիչ մասն է էլեկտրաէներգիայի կետը, և երբ որ 12 կետերի պահանջի հետ կապված ամփոփենք, դա էլ կլինի դրա հետ:
– Այսինքն, թեև թանկացված սակագինն ուժի մեջ է, և այս ընթացքում ոչինչ չի արվել, բայց սեպտեմբերի 30-ի՞ն եք պատրաստվում, որ հարցին անդրադառնաք:
– Գիտեք ինչ, քառյակն իր օրակարգն ունի, հայտարարել է, որ ժամկետ է դրված մինչև սեպտեմբեր, դա նշանակում է, որ պիտի սպասենք մինչև այդ ժամկետը գա, բայց եթե մինչև էդ քառյակն այլ որոշում ընդունի, մենք էլ այդ որոշման հետ համաձայն կլինենք: Ինչ վերաբերում է մինչև այս մեր ընդունած որոշումներին՝ 12 կետին, ապա մենք տեր ենք մեր հայտարարություններին: Սպասենք սեպտեմբերին:
– 12 կետերի կատարման շրջանը համընկավ սահմանում լարվածության հետ, և Հովիկ Աբրահամյանն զբաղված էր զինվորներին «քաջալերելու» գործով: Հետաքրքրվե՞լ եք, թե այս ընթացքում ինչ է արվել 12 կետերի ուղղությամբ, թե՞ զբաղվածության պատճառով հետաձգվելու է առաջադրված ժամկետը:
– Եթե սահմանի վրա իրավիճակը լարված է, դա հո չի՞ նշանակում, որ կառավարությունը պիտի գործերը թողնի ու դրանով զբաղվի, տարբեր ստորաբաժանումներ ունի, որ իրենց ամենօրյա պարտականությունները պիտի կատարեն, մեկը մյուսի հետ կապ չունի: Այսինքն, այնպես չէ, որ սահմանին կրակում են, պիտի նրանք իրենց գործերը թողնեն ու հետևեն այդ իրադարձություններին: Այն, ինչ նախատեսված է կառավարության ծրագրով՝ հարկային բլոկի հետ կապված, և այն, որ մենք ուզում ենք շրջանառության արտոնության շեմը 58,5-ից բարձրանա մինչև 150, այս նախագծերի հետ կապված՝ մեր առաջարկած փոփոխությունների արդյունքը մենք դեռ չենք տեսել, բայց կերևա առաջիկայում:
– Այսինքն, մինչև սեպտեմբերի 30-ը դուք 12 կետի կատարման վիճակից տեղյակ չե՞ք լինելու:
– Դե, մենք հարկային բլոկի տարբեր ռեժիմների վերաբերյալ փոփոխություններ ենք արել, դեռ ժամանակ ունեն կատարելու:
– Մեկնաբանություններ կան, որ սահմանում տեղի ունեցած լարվածությունը կարող է ազդել իշխանափոխության ծրագրի վրա: Այդպե՞ս է:
– Ես չեմ կարծում, որ մեկը մյուսին խանգարում է: Ցանկացած խնդիր, եթե պետական շահերից է բխում, պետք է ամեն ինչ դրա վրա խարսխված լինի:
– Ըստ Ձեզ, թեժ աշուն լինելո՞ւ է:
– Գիտեք ինչ, որերորդ տարին է, որ լրագրողներն ասում են՝ լինելու է թեժ աշուն, թեժ գարուն… Ես չգիտեմ թեժությունը, թեժ է լինելու, թե չէ, չգիտեմ ինչ է լինելու, բայց էն, ինչ որ լինելու է, սպասենք՝ կտեսնենք:
Հարցազրույցն ամբողջությամբ՝ թերթի այսօրվա համարում
