Արտակարգ իրավիճակների նախարար Արմեն Երիցյանն ՕԵԿ-ից դուրս գալուց հետո վերջնականապես խզել է իր կապերը կուսակցության հետ: Որոշ տեղեկություններով՝ նա անգամ չի խոսում և առհասարակ որևէ կապ չի պահպանել Արթուր Բաղդասարյանի հետ: Այսօր ԱԻՆ-ում «Առաջին լրատվական»-ի հետ զրույցում Երիցյանը հաստատեց, որ շփում չկա նախկին կուսակիցների հետ, բայց շտապեց ավելացնել, որ ինքն իր ընկերությունն առաջարկել է բոլորին: «Ես ինչ ՕԵԿ-ից դուրս եմ եկել, շփումներ չեն եղել ՕԵԿ-ականների հետ, բայց ես մշտապես էլ ասել եմ, որ Արթուր Բաղդասարյանն իմ ընկերն է: Մենք կարող ենք քաղաքական հայացքները չկիսել, բայց մնալ ընկերներ: Ես մեծ հաճույքով՝ մյուսների հետ էլ կարող ենք ընկերներ մնալ: Բոլորի մեջ թշնամի տեսնելը, ես կարծում եմ, ճիշտ չի: Ես իմ ընկերությունն առաջարկում եմ բոլորին, և եթե իրենք, որպես մարդ, կընդունեն իմ ընկերությունը, ես պատրաստ եմ բոլորի հետ էլ ընկերություն անել, բայց քաղաքական հայացքները կիսել չեմ կարող»,- ասաց Երիցյանը:
Այսինքն՝ ուզում եք ասել, որ իրենց կողմից է դադարեցվել շփումները՝ հարցրինք։ «Չէ, ոչ թե իրենց կամ իմ կողմից, պարզապես հիմա երևի արձակուրդներ են, բոլորն էստեղ չեն: …Իսկապես, ինչ ՕԵԿ-ից դուրս եմ եկել, ոչ ոքի հետ շփում չի եղել»:
Երիցյանից հետաքրքրվեցինք, եթե առաջիկայում նորից իրավիճակ փոխվի, և ՕԵԿ-ը հայտնվի իշխանական դաշտում, ինքը կրկին կդառնա՞ ՕԵԿ-ական: «Չէ, գիտեք, էնպես չի, որ ես գիշերները չեմ քնում, որ նախարար մնամ»: Բայց նախարարի պորտֆելը պահելու համար դուրս եկաք չէ կուսակցությունից՝ նկատեցինք։ «Այս ես պետք է ընտրեի. կամ իմ 7 հազարանոց անձնակազմը, կամ կուսակցությունը ընդդիմադիր դաշտում: Բայց ես որպես ընդդիմություն չեմ կարող հանդես գալ: Ընդդիմադիր կերպար ընդունել ես չեմ կարող, քանի որ ես միշտ եղել եմ ոստիկան, որից հետո եղել եմ նախարար: Դրա համար ես ընտրեցի էս ուղին և բնավ չէր նշանակում, որ եթե մյուսները ուրիշ ուղի էին ընտրել, ապա ես պետք է գնայի այդ ուղիով: Ես միշտ որոշումները ինքս եմ կայացրել: Ես կարծում եմ, որ ԱԻՆ-ում անելիքներ շատ ունեմ, բայց երբ ինձ կասեն հերիք է, ես կասեմ շնորհակալություն և կգնամ հանգստանալու»,- ասաց Արմեն Երիցյանը:
