«Դե, թուրքը մնում ա թուրք, էլի: Հա փորձում են, էլի, հետո պատասխանը ստանում են ու հանդարտվում: Միշտ էլ տենց ա էղել»,- «Առաջին լրատվական»-ի հետ զրույցում ասաց ԱԺ ՀՀԿ-ական պատգամավոր, գեներալ Սեյրան Սարոյանը:
Նրա խոսքով՝ Սոչիում երեք նախագահների հանդիպումը մեծ դերակատարություն ունեցավ իրավիճակի հանդարտեցման համար: «Տեսաք՝ մեր նախագահը ոնց դրանց պորտը դրեց տեղները: Նախագահը հասկացրեց, որ խելո՛ք մնացեք, հանգստացե՛ք, մի քանի հատ տանկ ավել կամ պակաս ունենալով չի: Էդ տանկերին օգտագործող է պետք, մենակ ունենալով չի»,- հավելեց Սարոյանը:
Սեյրան Սարոյանը համամիտ չէ այն տեսակետին, թե հակառակորդի վերջին ակտիվացումը հրահրված էր Ռուսաստանի կողմից, ինչպես նշում էին շատ վերլուծաբաններ ու քաղաքագետներ: «Ես այդ կարծիքին չեմ, քանի որ մեր Ռուսաստանը մեր պարտնյորն ա: Ռուսաստանը չէր կարող Ադրբեջանին դրդել, որ պատերազմի գնա, քանի որ այդ պատերազմը իրեն էլ էր վերաբերելու»:
Դիտարկմանը ի պատասխան, թե՝ բա ինչպե՞ս է պատահում, որ մեր պարտնյորը զենք է վաճառում Ադրբեջանին, Սարոյանը նկատեց. «Դե, դա բիզնես ա: Ու հետո՝ չես կարա ասես, թե Ադրբեջանը էդ զենքը մեր դե՞մ ա օգտագործելու, թե՞ չէ: Ադրբեջանը հո մենակ մեր հետ թշնամի չի, ուրիշ լիքը պրոբլեմներ ունի»:
Սեյրան Սարոյանից հետաքրքրվեցինք նաև, թե վերջին օրերին, երբ ազատամարտիկները կամավորագրվում և ռազմաճակատ էին մեկնում, որտե՞ղ էր ինքը, ինչու որևէ ձևով չէր արձագանքում տեղի ունեցողին, նա նկատեց. «Որովհետև մենք տիրապետում էինք իրավիճակին և գիտեինք, որ լուրջ բան չկա: Պանիկա պետք չէր քցել ժողովրդի մեջ: Եթե մենք էլ գնայինք, էս ժողովուրդը խառնվելու էր իրար: Իսկ մենք շատ լավ տիրապետում էինք իրավիճակին, կապի մեջ էինք ՊՆ-ի ղեկավարության հետ, և դրա կարիքը չկար: Մենք պանիկյոռ չենք, մենք մեր գործը լավ գիտենք: Իսկ եթե կարիքն արդեն լինի, որ մենք արդեն պետք ա գնանք, ապա՝ միանշանակ»:
Սարոյանը վերջում հավելեց, որ Մանվել Գրիգորյանի պես ինքն էլ Բաքվում կիսատ գործեր ունի, բայց անհրաժեշտության դեպքում նրա հետ չի գնա, այլ ուրիշ ուղղությամբ: «Երկուսով իրար հետ գնանք՝ ի՞նչ անենք, շատ կըլնի թուրքի համար»,- հումորով նկատեց նա:
