«Նախորդ տարիների համեմատ այս տարի դպրոցական պարագաները և հագուստը սեպտեմբերի մեկին ընդառաջ շատ չեն թանկացել, գները գրեթե նույն են»,- «Առաջին լրատվական»-ի հետ զրույցում ընդգծեցին Երևանի շուկաներից մեկում ուսումնական տարվան ընդառաջ իրենց երեխաների համար գնումներ կատարող ծնողները՝ հավելելով, որ խնդիրն այն է, որ անկախ գների փոփոխոթյունից՝ ծախսերը շատ են. «Ամեն ինչ պիտի առնենք՝ տաբատ, վերնաշապիկ, կոշիկ, պայուսակ, տետր, օրագիր, ամեն ինչ. նվազագույն առևտուրը մեկ երեխայի համար ամենաէժան գներով 40 հազար է, գրքերի գումարը չահաշված», ընդգծեցին ծնողները: Նրանց խոսքով՝ իրենք պարտավոր են զավակներին «գոնե մասամբ պատշաճ տեսքով» դպրոց ուղարկել: Ծնողներ կային, որոնք արդեն 60 հազար դրամի առևտուր էին կատարել, բայց դեռ երեխայի համար անհրաժեշտ պակաս իրեր կային: Ծնող կար, որի գնումը անցնում էր 100 հազար դրամը: Ի դեպ՝ մենք այցելել էինք համեմատաբար էժան գնային առաջարկներով շուկա: Նկատենք նաև, որ, չնայած ուսումնական տարվան ընդառաջ շուկաներում համեմատաբար շարժ է նկատվում, վաճառողները իրենց հերթին նշում էին, որ նախորդ տարվա համեմատ առևտուրը նվազել է. «Մենք էժան ենք տալիս, բայց ավելի շատ չենք կարող իջնել, երկրում շատ մարդ չի մնացել, մարդկանց ձեռքին փող չկա», ասաց վաճառողներից մեկը:
Առավել մանրամասն՝ տեսանյութում։
