«Այն հայտարարությունը, թե Ռուսաստանի դեմ պատժամիջոցներից Հայաստանը կարող է շահել՝ ակնհայտորեն իրականության հետ որևէ աղերս չունի, այդպիսի հայտարարությունը մինչև անգամ վտանգավոր է, կարծեք թե հերթական անգամ ժամանակ են շահում՝ չգիտեմ ինչ նպատակով, պատճառներով»,- «Առաջին լրատվական»-ի հետ զրույցում ասաց ԲՀԿ քաղխորհրդի անդամ, տնտեսագետ Վարդան Բոստանջյանը:
Ըստ նրա՝ այն իրականության հետ կապ չի կարող ունենալ բազմաթիվ պատճառներով, պատճառներից մեկը նաև այն է, որ ՀՀ-ն շուկայական հարաբերությունների ձևավորման անցած ժամանակահատվածում, ըստ էության, միշտ ունեցել է արտադրության, հատկապես վերամշակող, արտահանմանը ուղղված սուբյեկտների սահմանափակում, ինչու չէ՝ դադարեցում, արտահանման համար պարզագույն հզորություններ մենք չունենք:
«Մտածել, թե արտադրությունը, արտահանումը կարող է հզորանալ՝ առնվազն լուրջ չէ, այստեղ այս պահին այդպիսի հնարավորություն չունենք, այն իներցիոն, երկարատև և շարունակական պրոցես է, հատկապես գյուղատնտեսության ոլորտում, երկարաժամկետ, հետևողական ծրագրեր են պետք, որը մինչև այս պահը չի եղել»,- ընդգծեց Վարդան Բոստանջյանը՝ հավելելով, որ ընդհանրապես և հատկապես վերջին 6 տարիների ընթացքում Հայաստանում չի եղել այնպիսի քաղաքականություն, որով ձեռնարկություններին, սուբյեկտներին հնարավորություն կտրվեր արտահանման պոտենցիալը զարգացնել, մեծացնել. «Քաղաքականության միակողմանիության պայմաններում որոշ ներկրողներ, ունենալով համապատասխան արտոնություններ՝ բնականաբար ոչ օրինական, ըստ էության հետապնդելով գերշահույթ՝ կարող են մինչև անգամ ներկրել այնպիսի արտադրանք, որը մենք կարող էինք արտադրել»:
Ըստ նրա՝ խոշորները հենց այնպես չեն ծլարձակել, նրանք պետական մեքենայի դեմ ոչինչ չէին կարող անել: «Պարզապես ակնհայտ է՝ այսօր վարվող քաղաքականությունը խոցելի է, մի կողմից՝ ունենում ենք, այսպես կոչված, խոշորներ, մյուս կողմից՝ մարդկանց բանակ է ստեղծվում, որպեսզի մեղքը խոշորների վրա դրվի: Սևեռվածությունը, ամողջ բարդությունը մի ուրիշ կողմ տեղափոխելու համար փնտրում և գտնում են սուբյեկտներ»,- նկատեց տնտեսագետը ՝ հիշեցնելով նաև խոշորների, օլիգարխների վերահսկողության մասին»: Ըստ նրա՝ սխալ տնտեսական քաղաքականության հետևանքներից են աշխատատեղերի բացակայությունը, արտագաղթը:
Վարդան Բոստանջյանը նաև ընդգծեց, որ ՌԴ դեմ պատժամիջոցների պարագայում մեզ համար ևս մարտահրավերները մեծանում են: «Այո, պետք շեշտադրումները փոխվեն, հատկապես՝ Ռուսաստանում, բայց ոչ միայն՝ պայմանավորված այն հանգամանքով, որ ՀՀ-ն տնտեսական, քաղաքական կապերով կապված է ՌԴ հետ, և այս պարագայում խոսել, որ մենք օգուտ ենք քաղելու՝ առնվազն լուրջ չէ, այդպիսի բան չի կարող լինել երբեք»,- եզրափակեց տնտեսագետը:
Առավել մանրամասն՝ տեսանյութում:
