«Ես 6-7 օր է՝ դիմել եմ սննդամթերքի անվտանգության պետական ծառայություն՝ տեղեկացնելով թերի հավերի վաճառքի մասին, և տվել եմ արտադրողների անունները, տվել եմ նաև խանութի անունը որտեղ վաճառվում է, բայց դեռ պատասխան չկա»,- «Առաջին լրատվականի» հետ զրույցում ասաց «Սպառողների ասոցիացիա» ՀԿ նախագահ Արմեն Պողոսյանը։
Նա օրերս ահազանգել էր, որ սպառողները, ովքեր հավի ճտեր էին գնել «Երևան սիթիի» խանութներից մեկում, տեսքը կասկածելի համարելով՝ դիմել էին իրենց: Ըստ Պողսայանի՝ ինքը հավերից մեկի նմուշը պահել է. տեսքը շատ կասակածելի է, գույնը՝ ևս։ «Հայտնի չէ՝ արտադրողը հավի մեջ ներքին օրգաննե՞ր է թողել: Վատ է մշակել»,- մանրամասնեց նա՝ հավելելով, որ երկու այդպիսի արտադրող է նկատվել, որոնց հավերը կասկածելի տեսք ունեն, սակայն այս պահին, երբ ստույգ փորձաքննություն չկա, ճիշտ չէ դրանց անունները շոշափելը:
Ըստ նրա՝ մտահոգիչն այն է, որ սննդամթերքի անվտանգության պետական ծառայությունը դեռ չի արձագանքում, ոչ մի պատասխան չկա, գոնե մեկ փորձաքննությունից: Ա. Պողոսյանը «Առաջին լրատվականի» ներկայությամբ էլ զանգահարեց ծառայություն, և նրան պատասխանեցին, որ ծառայության պետը արձակուրդում է, այս պահին պատասխան չունեն:
Առավել մանրամասն՝ տեսանյութում։
