Այս պահին հարյուրավոր եզդիներ Երևանում ՄԱԿ-ի գրասենյակի դիմաց պահանջում են, որ գրասենյակում իրենց լսեն ու խորհրդակցություն անցկացնեն և եզդի ժողովրդի ցեղասպանության հարցը բարձրացնեն միջազգային ատյաններում, ինչպեսև զենքով օգնեն ոչ թե Իրաքի կառավարությանը, այլ այն տրամադրեն տեղի եզդիական համայնքին, քանի որ իրենց բնօրրանում՝ Շանգալում, 3 հազարից ավելի ջոկատներ են ձևավորվել, որոնք թե՛ զենքի, թե՛ պարենամթերքի կարիք ունեն:
Եզդի համայնքի ներկայացուցիչները պնդում են, որ անգամ մեկ օր հապաղելը կարող է ճակատագրական լինել եզդի ազգի համար, քանի որ Հյուսիսային Իրաքում ամեն օր սպանվում են թե՛ մեծերը, թե՛ երեխաները:
Մինչ ՄԱԿ-ի գրասենյակ հասնելը եզդիները պաստառներով անձայն անցել են կառավարության դիմացով: Նրանց խոսքով՝ կառավարությունը՝ ի դեմս արտգործնախարարության, չպետք է անտարբեր մնա խնդրին, քանի որ Հայաստանում ևս մեծ եզդիական համայնք է ապրում, և եզդիները հայերի հետ միշտ բարեկամական են ունեցել հարաբերություններ:
ՄԱԿ-ի գրասենյակում պատասխան ստանալուց հետո եզդիները հայտարարեցին, որ կրկին գնալու են կառավարության շենքի մոտ:
Նշենք, որ այսօր եզդիները հավաքվել էին նաև ԱՄՆ դեսպանատան առջև, որտեղ նույն պահանջներն են ներկայացրել:
Լուսանկարը` PAN Photo-ի