76-ամյա Ռիմա Ազարյանն ապրում է Աբովյան քաղաքի չորրորդ կարգի վթարային շենքում: Շենքից բնակիչներին վաղուց տարհանել են, քանի որ ուր որ է՝ շենքը կփլվի:
Ռիմա Ազարյանի ընտանիքը Բաքվից է տեղափոխվել Հայաստան: Ամուսինը 2006-ի նոյեմբերի 4-ին ավտովթարից է մահացել՝ այդպես էլ չտեսնելով իր սեփական տան պատերը: Մինչդեռ Ռիմա տատը պատմում է, որ երկու հարկանի հսկայական տուն են թողել Ադրբեջանում՝ ութ սենյակ…
Ադրբեջանից տեղափոխվել են ինքը, ամուսինը, երեք աղջիկների հետ: Աղջիկներին ամուսնացրել են, տներ ստացել են. «Ես էլ մնացի դռներին, մինին մի eրեխա է եղել, մի սենյակ է ստացել, մինին երկու երեխա՝ երկու սենյակ»:
Ռիմա Ազարյանը նշեց, որ 88-ից փախել են, սակայն այդպես էլ իրենց տեղը չեն գտել այս երկնքի տակ. «Ներվերիցս ոտքերս բռնվել են, ոչ կարում եմ քայլել, ոչ մի բան, ոչ զուգարան ունենք, ոչ ջուր ունանք»,- իր տուն ուղեկցեց Ռիմա Ազարյանը՝ ցույց տալով դույլը, որի մեջ մեկ շաբաթվա ջուր է. իսկ ինքը կարիքները հոգում է դույլի մեջ. «Վիդրումը անում եմ, փաթաթում, վայենկոմի զիբիլանոցում թափում, երկու ամսվա ջուր եմ խմում, ինչ անեմ, հա՞»,- լաց լինելով պատմեց կինը՝ հավելելով, որ եկավ Հայաստան «խորտակվեց»:
Նա պատմեց, որ թեև 30 ձեռք վերմակ ու ներքնակ է ունեցել, բայց Հայաստան է եկել դափ-դատարկ:
«Ամուսինս սվառչիկ էր աշխատում, հետո հիվանդացավ, ու երկուսս էլ տանը նստած ենք եղել»,- ասաց նա՝ հավելելով, որ հիմա էլ ինքն է հիվանդ, տոպրակներով դեղ է խմում:
«Դժոխք է, ինչ դրախտ, ահավոր է»,- ասում է կինը՝ հավելելով, որ երկու հաց է թխում մեկ շաբաթ ուտելու համար:
Ռիմա Ազարյանը այսքան տարի ապրել է առանց կոյուղու, առանց ջրի: Հիմա էլ թեև գիտի՝ շենքը ուր որ է կփլվի, բայց դուրս չի գալու, մինչև իրեն մնալու կացարան չտան:
Ավելին՝ տեսանյութում: