Եթե Ռուսաստանը խոստանա Ադրբեջանին վերադարձնել ԼՂ յոթ շրջանները, Ադրբեջանը կհամաձայնի ԼՂ հակամարտության կարգավորման ռուսական ձևաչափին: «Առաջին լրատվական»-ի հետ զրույցում այս մասին ասաց Բաքվի Քաղաքական ինովացիաների և տեխնոլոգիաների կենտրոնի տնօրեն, ադրբեջանցի քաղաքական վերլուծաբան Մուբարիզ Ահմեդօղլուն՝ մեկնաբանելով Սոչիում կայացած եռանախագահների հանդիպման արդյունքներն ու ռազմական լայնածավալ գործողությունների վերսկսման հնարավորությունը:
Նա նշեց, որ կա երկու հարթություն՝ ռուս-ադրբեջանական հարաբերությունները և ԼՂ հակամարտության կարգավորումը: Ըստ նրա՝ առաջին դեպքում հարաբերությունները զարգանում են բավականին ակտիվ, վստահության մակարդակը բարձրանում է, քանի որ Պուտինն ամեն հնարավորություն օգտագործում է Ալիևին սիրաշահելու համար: Իսկ երկրորդ հարթությունը, նրա խոսքով, ԼՂ հակամարտության կարգավորումն է, որում որևէ բան չստացվեց, քանի որ Լավրովը նշեց, որ մանրամասները, որոնք ամենակարևոր հարցերն են, կարգավորված և համաձայնեցված չեն:
«Այսինքն՝ ինչպիսին որ եղել էր հակամարտությունը մինչ Սոչիի հանդիպումը, նույն մակարդակի էլ մնաց: Մեկ այլ հանգամանք կցանկանամ նշել, այն է՝ վերջին շրջանում ավելի են բարելավվել ռուս-ադրբեջանական հարաբերությունները, ինչը չես ասի հայ-ռուսական հարաբերությունների մասին: Ադրբեջանն ընդունում է Ռուսաստանի հատուկ կարգավիճակը կարգավորման հարցում, իսկ Հայաստանն իրեն համարելով ՌԴ ռազմավարական գործընկեր՝ չի ընդունում ՌԴ հատուկ կարգավիճակը, ընդունում է Մադրիդյան սկզբունքները, իսկ, ինչպես երևում է, հայաստանցիները դրանք չեն ընդունում: Այնուհետև նա նշել էր, որ հակամարտության կարգավորման խոչընդոտ է այն, որ փաստաթուղթը տարբեր կերպ է ընկալվում Հայաստանում և Ադրբեջանում, իսկ եթե երկու երկրներում էլ փաստաթուղթը նույն կերպ մեկնաբանվեր, ապա հակամարտությունը կկարգավորվեր: Խոսում է, որ հանդիպման հիմքը Կազանի հանդիպումն էր, այնինչ երեք նախագահները Կազանի հանդիպումը հիմք չէին վերցրել: Արդյունքն այն էր, որ ոչ մի համաձայնություն ձեռք չբերվեց, և դա Ռուսաստանին նյարդայնացնում է:
Սոչիի հանդիպումից հետո գործընթացները զարգանալու են այս ուղղությամբ: Ադրբեջանի ծրագրերը չեն փոխվել, պատերազմը վերսկսվել է, այս օրերին ավելի ծանր զենք է կիրառվել երկու կողմերի կողմից: Միակ բանը, որը կարող է պատերազմը դադարեցնել, ԼՂ հակամարտության կարգավորումն է»,- ասաց փորձագետը՝ հավելելով, թե դեռ քննարկում են, փորձում հասկանալ՝ ինչ է պլանավորում Ռուսաստանը:
Նրա խոսքով՝ եթե Ռուսաստանը ծրագրում է Ադրբեջանին վերադարձնել օկուպացված հողերը, ապա Ադրբեջանը կողմ է հակամարտության կարգավորման ռուսական ձևաչափին, քանի որ Մինսկի խումբն իրեն սպառել է:
