1991-ի դեկտեմբերի 8-ին Բրեստի մոտ (Բելառուս) գտնվող Վիսկուլի բնակավայրում ՌԴ ԽՍՀ նախագահ Բորիս Ելցինը, Ուկրաինայի նախագահ Լեոնիդ Կրավչուկը և Բելառուսի Հանրապետության Գերագույն խորհրդի նախագահ Ստանիսլավ Շուշկևիչը ԽՍՀՄ-ի փլուզման և Անկախ Պետությունների Համագործակցության ստեղծման մասին համաձայնագիր են ստորագրել:
Փաստաթղթում նշված էր, որ ԽՍՀՄ-ը դադարում էր գոյություն ունենալ որպես միջազգային իրավունքի և աշխարհաքաղաքական իրականության սուբյեկտ: Դեկտեմբերի 10-ին համաձայնագիրը վավերացվել է Բելառուսի և Ուկրաինայի Գերագույն խորհուրդների, իսկ դեկտեմբերի 12-ին՝ Ռուսաստանի Գերագույն խորհրդի կողմից:
Դեկտեմբերի 13-ին Թուրքմենստանի Աշխաբադ քաղաքում տեղի է ունեցել ԽՍՀՄ կազմի մեջ մտնող Կենտրոնական Ասիայի հինգ պետությունների՝ Ղազախստանի, Ղրղըզստանի, Տաջիկստանի, Թուրքմենստանի և Ուզբեկստանի նախագահների հանդիպումը։ Արդյունքն այն հայտարարությունն էր, որում երկրները համաձայնություն էին հայտնում մտնել այդ կազմակերպություն` պայմանով, որ ապահովվի նախկին միության սուբյեկտների իրավահավասար մասնակցությունը և ԱՊՀ բոլոր պետությունների, որպես հիմնադրի, ճանաչումը։