«Դ!ԵՄ ԵՄ» քաղաքացիական նախաձեռնությունը հայտարարել էր Թումո ստեղծարար տեխնոլոգիաների կենտրոնին հարակից այգում ժամը 20:15-ին հանրային բացօթյա կինոդիտման մասին: Պետք է ցուցադրվեր ֆիլմ Մահաթմա Գանդիի անցած ճանապարհի մասին, որից հետո պետք է տեղի ունենար նաև հանրային քննարկում երկրում անհրաժեշտ լուրջ փոփոխությունների, արատների, խնդիրների ու դրանց հնարվոր լուծումների վերաբերյալ:
Նախատեսված ժամին, սակայն, «Դ!ԵՄ ԵՄ»-ի անդամներին մոտեցան տեղի անվտանգության և տնօրինության ներկայացուցիչներն ու ասացին, որ ֆիլմի ցուցադրությունը տարածքում հնարավոր չէ իրականացնել, քանի որ այգին մանկական է: Նախաձեռնության անդամները շուրջ կես ժամ փորձեցին բանակցել, բայց անօգուտ: Դեռ ավելին, այգու լույսերն անջատեցին, որպեսզի խոչընդոտեն նաև հանրային քննարկմանը։
«Գիտեք, ֆիլմը Մահաթմա Գանդիի մասին էր, ընդ որում, 20-րդ դարի ոչ բռնի քաղաքացիական պայքարների մասին էր։ Երբևէ քաղաքական չենք եղել, մեր պայքարը քաղաքացիական է եղել։ Դա, ինչ խոսք, կարող է զուգորդվել քաղաքական համակարգին, ինչը անխուսափելի է, բայց սա ամենա, ամենա, ամենաոչքաղաքական քայլն էր, որ մենք այսքան լռությունից հետո ուզում էինք անել. ընդամենը ֆիլմի դիտում ամառային զով երեկոյին, որը չի քարոզում ոչ մի բռնություն ոչ մի վատ բան, այլ մարդակային արժանապատվության խնդիրն է քննարկում, ընդամենը քննարկում»,- «Առաջին լրտվականի» հետ զրույցում ասաց «Դ!ԵՄ ԵՄ» քաղաքացիական նախաձեռնության անդամ Դավիթ Մանուկյանը՝ հավելելով, որ նախօրոք ֆիլմի դիտման մասին պայմանավորվածություն եղել է։
«Ֆիլմի դիտումը տեղի չունցավ, քանի որ փորձում էին քաղաքական աստառ տալ. ինչ ա նշանակում քաղաքական աստառ, կամ որտեղ է այն՝ ոչ ոք մեզ չբացատրեց, ուղղակի ինձ համար ցավալի է, որ 21-րդ դարում ՀՀ-ն դեռ 20-րդ դարի սկզբի Հնդկաստանի չափ էլ չկա, այսինքն՝ ըստ ազատությունների, որ մարդիկ չեն կարող դիտել և խոտերի մեջ նստած քննարկել։ Սրանում, վստահ եմ, բոլորիս մեղքը կա, սա է այսօրվա Հայաստանը»,- նկատեց Դավիթ Մանուկյանը՝ հավելով, որ կոնկրետ տեղի տնօրինությանը չի մեղադրում, քանի որ նրանք իշխանության ճնշման ներքո են:
Նշենք, որ «Առաջին լրատվականին» ևս փորձում էին թույլ չտալ տարածքում նկարահանումներ կատարել:
Առավել մանրամասն՝ տեսանյութում։
