Հայաստանն ավելի ու ավելի է կարևորվում Արևմուտքի համար. Այս մասին «Առաջին լրատվական»-ի հետ զրույցում ասաց Ֆրանսիայի Ռազմավարական հետազոտությունների հիմնադրամի փորձագետ, քաղաքագետ Կայծ Մինասյանը՝ անդրադառնալով ԼՂ հակամարտության գոտում առկա լարվածությանն ու Սոչիում նախատեսվող հանդիպումներին:
Նա հաստատեց մամուլում շրջանառվող տեղեկությունները, թե Ֆրանսիայի նախագահ Ֆրանսուա Օլանդի առաջարկի հիման վրա ԼՂ հակամարտող կողմերի նախագահները՝ Սարգսյանն ու Ալիևը, պետք է հանդիպեին հոկտեմբեր ամսին: Նրա հավաստիացմամբ՝ անկախ Սոչիում նախատեսվող հանդիպումներից, հոկտեմբերյան հանդիպումն ուժի մեջ է, և Արևմուտքը հետևողական է լինելու այդ հանդիպումը կազմակերպելու հարցում:
Ֆրանսաբնակ փորձագետն ասաց, որ Ղարաբաղյան հակամարտությունը ներկայումս ԵԱՀԿ Մինսկի խմբի փոխնախագահների միջև խնդիր է դարձել, այսինքն՝ Ռուսաստանն այնպիսի քաղաքականություն է վարել, որ ԼՂ հակամարտության գոտում իրավիճակը սրվի այնքան, որպեսզի ինքը նախաձեռնի նման հանդիպում: Ըստ Կայծ Մինասյանի՝ Ռուսաստանը փորձում է ցույց տալ, որ տարածաշրջանն իրեն է պատկանում, այսինքն՝ ԵԱՀԿ Մինսկի խմբի փոխնախագահներին ուզում է ցույց տալ իր առավելությունն ու առաջնորդությունը։ Պուտինն այնքան վատ հեղինակություն է ձևավորել միջազգային հանրության աչքում, որ այսօր փորձում է ԼՂ հակամարտությունում միջնորդական ջանքերի շնորհիվ ցույց տալ, որ խաղաղություն է փորձում հաստատել: Միևնույն ժամանակ, փորձագետը կարծում է, որ այս ամենն արվում է նաև այն պատճառով, որ Ռուսաստանը ցանկանում է խաղաղապահ ուժեր տեղակայել Ղարաբաղում:
«Պուտինն առանձին-առանձին հանդիպումներ պետք է ունենա Ալիևի ու Սարգսյանի հետ, նախատեսվում է նաև եռակողմ հանդիպում: Եթե հանդիպման արդյունքում այս իրավիճակը շարունակվի, կհասկանանք, թե ինչ Պուտինն ասաց Ալիևին: Արևմուտքը, իմանալով, որ Ռուսաստանը խաղ է խաղում, փորձում է շարունակել իր ներկայությունն ընդգծել այս հակամարտությունում և ասել, որ հոկտեմբերի հանդիպումը ուժի մեջ է տակավին, որ Ղարաբաղի գործընթացը միայն Ռուսաստանին չի պատկանում: Դրա համար է, որ Ուորլիքը իր թվիթերյան էջում հայտարարեց, թե շնորհավորում է Պուտինին նրա նախաձեռնության համար. դա դիվանագիտական խոսք էր՝ նպատակ ունենալով ցույց տալ, որ հետևում են այդ գործընթացին: Պիեռ Անդրին ևս գնաց ԱՄՆ համանախագահի հետ հանդիպելու ԱՄՆ-ում, բայց չգնաց Մոսկվա, այսինքն՝ համաշխարհային համակարգի մեջ այսօր ռազմաքաղաքական նոր զարգացումներ ենք տեսնում:
Ռուսները լավ հարաբերություններ չունեն Արևմուտքի հետ և ուզում են ցույց տալ, որ ունեն միջոցներ տապալելու, չեզոքացենլու Արևմուտքին Կովկասում: Բայց ֆրանսիացիներն ու ամերիկացիները միամիտ չեն, ու ամեն ինչ պետք է անեն, որպեսզի գոնե դիվանագիտական մակարդակով իրենց ներկայությունը ցույց տան: Ռուսները, իմանալով, որ կա արևմտյան նախաձեռնություն, ցանկացան խփել այդ գործընթացին, չեն ցանկանում, որ Արևմուտքը շատ միջամտի ու նախաձեռնություններով հանդես գա:
Այս հանդիպումը կարելի է համեմատել 2008 թ. Մայն Դորֆի հետ: 2008 թ. ռուս-վրացական պատերազմից հետո Ռուսաստանի հեղինակությունը շատ թույլ էր միջազգային համայնքի աչքում։ Երեք ամիս հետո Մեդվեդևը նախաձեռնեց հանդիպում, և առաջին անգամն էր, որ երեք նախագահները՝ Ալիևը-Սարգսյանը միացյալ հայտարարություն ստորագրեցին, դա առաջին քայլն էր, որ գործընթացը փորձեցին բացել Մինսկի խմբի գործընթացում: Այսօր նույնն է տեղի ունենում Ուկրաինայի դեպքերի ֆոնին. Պուտինը նախաձեռնում է հանդիպում երկու պատճառով՝ ցույց տալու համար, որ խաղաղություն է տարածում, և երկրորդ պատճառը՝ որ նոր գործընթաց սկսի Մինսկի խմբում: Կարևոր է, որ ադրբեջանցիներն ու ռուսները օբյեկտիվորեն նույն շահերն ունեն: Ուզում են քանդել Մինսկի ֆորմատը, ուզում են տկարացնել այդ ֆորմատը:
Հայերը Մինսկի խմբի կարիքն ունեն, Արևմուտքն էլ կարիքն ունի, քանի որ դա լծակ է, որ իր ներկայությունը պահպանվի տարածաշրջանում: Հոկտեմբերին հանդիպումը կկայանա: Արևմուտքն ուզում է ցույց տալ, որ իրենք էլ կարող են նախաձեռնություն վերցնել, և միայն Ռուսաստանը չէ»,- ասաց Կայծ Մինասյանը:
Վերջինիս համոզմամբ, այս լարված փուլում Հայաստանն ավելի կկարևորվի Արևմուտքի համար, քանի որ Արևմուտքի համար չափազանց կարևոր են Բաքու-Թբիլիսի-Ջեյհան և Բաքու-Թբիլիսի-Էրզրում պրոյեկտները, որոնք ռազմական գործողությունների դեպքում կարող են հայտնվել հայկական զինուժի թիրախում և մեծ վնասներ պատճառել արևմտյան հսկայածավալ ներդրումներին:
«Զարմանալի չէ, որ Դավիթ Տոնոյանն այս օրերին գտնվում է ԱՄՆ-ում: Նա հանդիպում ունեցավ Պենտագոնի պաշտոնյաների հետ: Կարելի է ասել, որ դիվանագիտական առումով Հայաստանն ավելի ու ավելի կարևոր է դառնում Արևմուտքի համար»,- նշեց Կայծ Մինասյանը: