«Խուճապի խնդիր կա, մեր ընկեր տղաները զոհվեցին, որ մենք խուճապի չմատնվենք, որ ավելի լավ բանակ ունենանք։ Փառք Աստծո, մենք բանակ ունենք, փառք Աստծո, մեր զինվորները կարողացան պատասխան տալ»,- «Առաջին լրատվական»-ի հետ զրույցում ասաց ազատամարտիկ, Դաշտային հրամանատարների խորհրդի անդամ Սուրեն Սարգսյանը: Փոխարենը, նրա խոսքերով, չստացված մարդկանց կամուֆլյաժներ են հագցնում, հասցնում դիրքեր:
«Իհարկե, մեծ ցավ էին զոհերը։ Մեր տղերքն էլ զոհվեցին, գուցե մեր բախտը չի բերել, որ չենք զոհվել, բայց խուճապի մատնվելու կարիք վստահաբար չկա։ Իսկ ինչ վերաբերում է լայնածավալ կռվին, Հայաստանի իշխանություններն ավազակ են, և եթե լայնածավալ կռիվ լինի, առաջին հերթին այս իշխանություններին առաջն անել է պետք և ռազմի դաշտ տանել: Եվ մենք դա ձեզ խոստանում ենք»,- ասաց Սուրեն Սարգսյանը՝ հավելելով, որ եթե բանը հասնի դրան, ապա բոլոր կամուֆլյաժ հագած տղերքը պետք է գնանք առաջին գիծ և կռվեն:
«Արդյոք նրանք իրենց կուտակած հարստությունը կներդնե՞ն բանակի մեջ» հարցին նա պատասխանեց. «Ո՞ր գողն է իր ունեցվածքը տվել, խիստ կասկածում եմ, բայց բոլոր նրանք, ովքեր թալանել են, այդ թալանը չեն վայելելու, դա վստահաբար: Բայց այստեղ ուրիշ խնդիր կա. մեզ պետք է մտահոգի, թե ինչո՞ւ մինչև այսօր բանակում գիտական ներուժի ներդրում չեն արել, սա լուրջ պակաս է, և պատասխանատուները պետք է պատժվեն: Եվ այսօր մենք կունենայինք ավելի անվտանգ զինվոր: Եթե չգիտեմ՝ դա որքան պետք է արժենար, իսկ այսօր կարող է այս պաշտոնյաների գրպանից հինգ միլիոն ընկնի, նրանք գլխի չընկնեն, որ կորցնել են»:
Ձևականություններով, ըստ նրա, պետք չէ բանակին խանգարել. Մարտակերտում, սահմաններում կան տղերք, որ առաջին օրից մասնակցել են պատերազմին, նրանք նորից դիրքերում են՝ մեր զինվորի կողքին:
«Եվ այսպես աղմուկ մի հանենք, թե ամենքս մի թվանք վերցնենք, գնանք, էլ ինչո՞ւ էինք մենք պետություն ստեղծում, որ ինչ-որ թվաքներ պետք հավաքեինք գնայինք։ Եթե կարիքը կհասնի մեզ, մենք, բնականաբար, տեղում կլինենք: Մնացած բոլորը կապիկությունների շարքից են, պետք չէ ոչ հոխորտալ, ոչ ասել, ընդամենը պետք է հավուր պատշաճի վերահսկողություն սահմանել, որպեսզի մեր բանակն ավելի հզորանա, որ «ատկատներ» բանակում չլինեն, որպեսզի այդ սենսորային պաշտպանությունը ապահովվի»,- ասաց Սուրեն Սարգսյանը:
Իշխանությունների դեմ պայքարը չի ավարտվել։ Ըստ նրա՝ այս իշխանություններին պետք է մեկ ժամ առաջ երկրից վռնդել, բայց ոչ թե օտար երկիր, այլ Կոշի գաղութ:
Շատերը, նրա խոսքերով, մոռացել են հայրենիքն էլ, մայրենիքն էլ, սկզբունքն էլ։ Փողը, իշխանությունը այս մարդկանց կերավ, կան հանցախմբեր, որոնցով պետք է զբաղվել:
Ազատամարտիկների դաշինքի խորհրդի կազմով մյուս շաբաթ ասուլիս կհրավիրեն, կտեղեկացնեն առաջիկա անելիքների մասին: Այս ապօրինությունների դեմ պայքարը շարունակվում է:
«Եկեք բանակին չխանգարենք ավելորդ սուտ ոգևորությամբ, սուտ վարչապետեր և քաղաքական կուսակցություններ, մի՛ գնացեք դիրքեր, սպեկուլյացիա մի՛ արեք, դա ձեզ չի օգնի։ Եթե դուք քաղաքական ուժ եք, բարի եղեք լրջորեն զբաղվել քաղաքականությամբ և այս ապիկարներին ճանապարհ դրեք»,- ասաց նա:
«Տիգրան Մեծ» աշխարհազորային գնդի մարտիկ Էդվարդ Ներսիսյանը, «Առաջին լրատվական»-ին ցույց տալով իրենց գնդի զոհվածների նկարները, նշեց. «Մարտական ընկերները մեկը մեկից թանկ ու անգնահատելի գանձ են, այսօր հողը սրբացել է հենց իրենց աճյուններով: Իսկ ում համար օտար է այս հողը, ինքը կարող է՝ առհասարակ ռադ լինի էս հողից, ով սա իր համար ցեխի տեղ է դրել»:
«Ինքը գիտի, թե սպիտակ հալներիս պետք է գնանք պաշտպանենք իր կարողությունը, ղալաթ ա արել ինքը, մենք իրեն չենք պաշտպանելու, մենք մեր հողն ենք պաշտպանելու,- ասաց նա՝ վստահ նշելով,- տո, ավելի բեթար էլ կպայքարենք, մենք ավելի բեթար էլ կպայքարենք, մենք էն վախտ էլ կարայինք լավ պայքարեինք, Բաքուն էլ լցնենինք Կասպից ծովը: Աստված չանի, պատերազմ սկսվի։ Իհարկե, սա արդեն ավտոմատի կռիվ չի լինելու, ոչ մեկը չգիտի՝ իրեն ինչ ճակատագիր է սպասվում: Ինձ հետաքրքրում է իշխանության պահած պոնչիկ ուտող բալեքից կգա՞ն սահմանները պաշտպանեն, ամենակարողը իրենք են, միլիոններ իրենք ունեն, տարածքներ իրենք ունեն, ամեն տեղ փոս են փորում, սուպերմարկետ սարքում:
Ձեր հողին պարտաճանաչ ծառայեք, պարտաճանաչ ձեր հողը պաշտպանեք, սրիկանե՛ր, ոչ թե մենակ կամուֆլյաժ հագնեք՝ գնաք նկարվեք ու գաք: Կգա օրը՝ պատասխան եք տալու սաղ ձեր արածների համար, ու մեկ ա, կրելու ենք էս կռիվը»,- հավելեց նա:
Ավելին՝ տեսանյութում: