Նույնիսկ այն կենդանիները, որոնց բնորոշ չէ հանդարտ ու մեղմ վարքը, երբեմն այնպիսի արարքներ են իրականացնում, որոնք ընդունակ են հուզելու նույնիսկ ամենագթազուրկ սիրտը: Բուդապեշտի կենդանաբանական այգում արջը ջրհորից հանել է ագռավին և դրանով իսկ փրկել նրա կյանքը:
Թե ինչպես է թռչունը հայտնվել ջրամբարի մեջ, հայտնի չէ, սակայն կենդանաբանական այգու այցելուներից մեկը հասցրել է նկարահանել փրկարարական գործընթացը: Ագռավը լողում է ջրամբարում, իսկ արջը սկզբում փորձում է նրան դուրս հանել թաթերով, իսկ հետո ինքն իրեն օգնում է ատամներով ու թռչունին զգուշությամբ ցամաք հանում:
Բրիտանական Independent ամսագրի լրագրողներն այդ տեսանյութը հայտնաբերել են YouTube-ում:
«Հավանական է, որ մենք իրականում տեսնում ենք, թե ինչպես է արջը դուրս բերում իր ճաշը: Բայց մի պահ բացասական մտածելակերպը մի կողմ դնենք, քանի որ դա կարող է աշխարհի ամենաբարի արջը լինել, և իրականում նա սիրում է այդ ագռավին»,- ասում են նրանք:
Իրականում ագռավին ջրից հանելուց հետո արջը կորցնում է նրա նկատմամբ հետաքրքրությունը և այն կողմ է գնում խնձոր ուտելու համար: Իսկ ագռավը շարունակում է անշարժ մնալ, իսկ երբ ուշքի է գալիս ու ոտքի կանգնում, չի շտապում հեռանալ արջի ճաղապատ տարածքից։