Հուլիսի 31-ին հյուսիսային հատվածում մարտական հերթապահություն իրականացնող զորամասերից մեկի պահպանության տեղամասի ուղղությամբ հակառակորդի գործողության արդյունքում զոհվել են ՊԲ զինծառայողներ՝ 1994թ. ծնված Արարատ Խանոյանը և Ազատ Ասոյանը:
Ազատ Ասոյանը տասը օրից զորացրվելու էր: Հերոս Ազատ Ասոյանը Ֆեյսբուքի օգտատեր էր, հաճախ էր գրառումներ անում:
«Ինչ լավ է, որ մարդիկ ուրախ են, սաղի մոտ Նոր տարի է, ուրախ տոնական տրամադրություն, գույնզգույն լույսերով նկարներ, մենակ մեզ մոտ ա, որ Նոր տարի լինի, թե ուրիշ տոն՝ կյանքը սև ու սպիտակ ա»,- Ամանորին գրել էր քաջ զինվորը, ապա շնորհավորել հայությանը:
«Սիրելի հայեր, շնորհավորում եմ ձեր Նոր տարին, ցանկանում ձեզ ամենալավն ու բարին, հա, մեկ էլ սեր, որովհետև սերը ուժեղ բան ա, պոստերում ընկերոջ հանդեպ սերը փրկում ա իր կյանքը. սիրեք իրար և ուրախացեք: Ինչ մնում ա անվտանգությանը, թողեք մեզ վրա: Հարազատներ ջան, ուզում եմ հիշեցնեմ, որ ԶԻՆՎՈՐԻ շնորհիվ ա, որ դուք հանգիստ քնում եք կամ Ֆեյսբուք եք մտնում: Խնդրում և պահանջում եմ՝ մի՛ ԱՐՀԱՄԱՐՀԵՔ ՆՐԱՆՑ»:
Բանակի մասին էլ գրել էր. «Բանակ՝ ինչ հասարակ ու հեշտ թվացող կյանք, բայց էս բառի մեջ էնքան իմաստ կա, որ եթե սկսեմ, չեմ պրծնի: Ստեղ շատ բան կորցնում ես, քիչ բան սովորում, բայց էդ քիչ սովորածը կշեռքի վրա ավելի շատ է կշռում, քան կորցրածդ: Ծառայեք, լավ բան ա իրականում, բայց ձեզ հակառակն ա թվում»,- գրել էր հերոս զինվորը…