Վաշինգտոնը լուրջ մտահոգություն է հայտնել հայտնի իրավապաշտպան Լեյլա Յունուսի ձերբակալության և նրա ամուսնու՝ Արիֆ Յունուսի քրեական հետապնդման վերաբերյալ, որին մեղադրում են Հայաստանի օգտին լրտեսության, հայրենիքի դավաճանության, հարկերից խուսափելու և խարդախության համար: Այս մասին հայտնում է Turan-ը:
«Հայտնի իրավապաշտպան Լեյլա Յունուսի և նրա ամուսին Արիֆ Յունուսի նկատմամբ քրեական մեղադրանքները լուրջ մտահոգություն են առաջացնում և վկայում են Ադրբեջանում քաղաքացիական հասարակության խաղաղ գործունեության հետագա սահմանափակման մասին»,- հայտարարել է ԱՄՆ մամլո քարտուղարի տեղակալ Մարի Հարֆը:
«Այդ մեղադրանքները, երևում է, կապված են ազգային դիվանագիտության ծրագրերին նրա մասնակցության հետ, որոնք ուղղված են տարածաշրջանում լարվածության նվազելուն և վստահության ձևավորմանը»,- ասել է Հարֆը:
«Մենք Ադրբեջանի կառավարությանը հետևողականորեն կոչ ենք անում հարգել իր քաղաքացիների հիմնական իրավունքները, ապահովել նրանց արտահայտվելու ազատության՝ երկրի միջազգային պարտավորություններով երաշխավորված իրավունքը»,- նշել է նա:
Նույն օրը ԱՄՆ Հելսինկյան հանձնաժողովը դատապարտել է Յունուս ընտանիքի դեմ քրեական մեղադրանքները. «Յունուս ընտանիքին ներկայացված մեղադրանքները վրդովեցուցիչ են…. Լեյլան և Արիֆը երկար ժամանակ ազգային դիվանագիտության շրջանականերում կապեր են պահպանում Հայաստանի հետ: Ուստի նրանց դեմ լրտեսության մեջ մեղադրանքներն անհեթեթություն են:
Մենք Ադրբեջանի կառավարությունից պահանջում ենք այդ մեղադրանքները հանել և վերջ տալ Ադրբեջանում կոորդինացված արշավին ընդդիմության, քաղաքացիական հասարակության և լրագրողների դեմ, որոնք խաղաղ իրագործում են խոսքի ազատության և հավաքների ազատության իրենց իրավունքը»,- ասվում է հանձնաժողովի համանախագահներ Բեն Քարդինի և Քրիստոֆեր Սմիթի հայտարարության մեջ: