Ընդհատումից հետո ամերիկյան վիզաների հանձնման համակարգի վերականգնումը կտևի մի քանի շաբաթ, հինգշաբթի հայտարարել է պետդեպարտամենտի ներկայացուցիչ Մարի Հարֆը, հաղորդում է RIA Novosti-ն։
ԱՄՆ մի շարք հյուպատոսություններում, այդ թվում՝ Ռուսաստանում, հուլիսի 20-ից վիզաներ են հանձնում ընդհատումներով։ Պետդեպարտամենտը պարզաբանել է, որ խնդիրները շարունակվում են արդեն մի քանի ամիս։ Համակարգ մատակարարող ընկերությունը տրամադրել է ծրագրային ապահովման թարմացում, սակայն դրանից հետո համակարգը «կախվել» է։
«Մենք ենթադրում ենք, որ կպահանջվեն շաբաթներ, որպեսզի լիովին վերականգնվի համակարգի աշխատանքը»,- ասել է Հարֆը։
Նրա խոսքով՝ ընդհատման պահից ԱՄՆ-ը ամբողջ աշխարհում 180 հազար վիզա է տվել 270 հազարի փոխարեն։ Նա նշել է, որ իրավիճակը կարգավորվում է, սակայն կուտակվել է վիզաների «զգալի քանակություն»։ Առաջիկայում նախապատվությունը կտրվի նախևառաջ որդեգրման հետ կապված ներգաղթային վիզաներին, ճշտել է Հարֆը։