Երեկ երեկոյան Տավուշի մարզի Այգեձոր համայնքի արոտավայրերում հակառակորդի գնդակից վիրավորված, գյուղի բնակիչ, 1965 թ. ծնված Վալերի Ճաղարյանին վաղը դուրս կգրեն հիվանդանոցից: Այս մասին «Առաջին լրտվական»-ին տեղեկացրեց Այգեձոր համայնքի ղեկավար Սասուն Սաֆարյանը։ «Մազապուրծ է եղել, թիակին է կպել, ոսկորը չի ջարդել, լավ է՝ ճարպիկ է եղել, կարողացել է փախչել, հետո տեղափոխել ենք Բերդի հիվանդանոց»,- հավելեց նա:
Վալերի Ճաղարյանը համայնքի ղեկավարին պատմել է, որ անասուներին արածացնելիս շրջակայքում անտառ է եղել, որտեղից փորձել է փայտ հավաքել, փայտը հավաքելուց հետո փորձել է այն տեղափոխել. «Հանկարծ շունը հաչացել է, և Վալերին տեսել է, որ թուրք է մոտենում, ու փորձել փախչել, բայց նրան չի հաջողվել խուսափել հրազենային վնասվածքից»:
Համայնքի ղեկավարը նաև ընդգծել է՝ չնայած Ադրբեջանի ոտնձգություններին, գյուղը ոչ ոք չի լքելու, տեր են կանգնելու իրենց հողերին:
