Օգոստոսի 1-ից էլեկտրաէներգիան արդեն կմատակարարվի 4 դրամով ավելի թանկ, չնայած նրան, որ սպառողները փորձեցին ընդվզել և մեծամասամբ հորդորում էին՝ վերանայել թանկացման որոշումը. «Ես սա ուղղակի համարում եմ խուլիգանություն և վերջ», նշեց «Առաջին լրատվական»-ի հարցախույզին մասնակցած երևանցիներից մեկը: Մեծամասամբ հարցախույզի մասնակիցները համարում էին, որ թանկացումը «վերևներից» է թելադրված. ցավոք, հարցախույզի մասնակիցներից շատերը թևաթափ էին եղել և չէին կարծում, որ որևէ բան այս երկրում հանրությունը ի զորու է փոխել։ «Դժվար ա, խնդիրներ են առաջանալու, բայց ի՞նչ կարող ենք անել, այլևս հույսեր չունենք. Հայաստանում ենք ապրում, պիտի հարմարվենք», նկատեցին հարցախույզի մասնակիցները: Ոմանց կարծիքով՝ եթե պայքարող փոքր խմբի շուրջ միավորվի ամբողջ հասարակությունը, կարող ենք հաջողությունների հասնել, բայց շատերը տանը նստած բողոքում են, բայց պայքարի դուրս չեն գալիս: Ոմանք էլ ընդգծեցին, որ սա հերթական առիթն է լինելու, որպեսզի երկիրը լքելուց առաջ երկար չմտածեն:
Հարցախույզի մասնակիցների կարծիքով՝ էլեկտրաէներգիայի թանկացումը շղթայական ռեակցիա է ունենալու. ընդհանուր թանկացումներ են լինելու. «Ձեռնարկատերերը առիթից կօգտվեն իրենց ապրանքը կթանկացնեն, ինչը լուրջ ազդեցություն կունենա պարենային զամբյուղի վրա», նկատեց հարցախույզի մասնակիցներից մեկը: Ընդհանուր առմամբ, թանկացումն ըստ քաղաքացիների՝ վատ դրության մեջ է դնելու հատկապես նրանց, ովքեր նվազագույն աշխատավարձ են ստանում և առանց այն էլ «ապրելու» խնդիր ունեն:
Առավել մանրամասն՝ տեսանյութում։