ՕԵԿ-ն ու Ագրարային համալսարանն այդպես էլ չեն կարողանում կիսել երկու հաստատությունների միջև գտնվող տարածքը, որի շուրջ վեճն արդեն իսկ հասել է դատարան: Եվ մինչ վեճը կլուծվի դատական կարգով, կողմերը զուգահեռ այն փորձում եմ լուծել սեփական ուժերով՝ ակցիաներով: Երեկ ՕԵԿ տիկնայք էին հավաքվել վիճահարույց շենքի շուրջ, այսօր էլ՝ Ագրարային համալսարանի պրոֆեսորադասախոսական կազմն ու ուսանողներն էին մինի այցիա իրականացնում շենքի մոտ՝ փորձելով ապամոնտաժել անկախ դատարանի որոշումից այս օրերին բավականին կառուցված շենքը: Դասախոսները, սակայն, ուսանողներին հորդորեցին չգնալ այդ քայլերին եւ որոշակի բանակցություններից հետո ցրվեցին: Համալսարանի ներկայացուցիչները ՕԵԿ-ից պահանջում են դադարեցնել շինարարությունը, մինչև կլինի դատարանի որոշումը, հաշվի առնելով նաև այն հանգամանքը, որ առկա է դատարանի որոշում, որ իրենք իրավունք չունեն որևէ շինարարություն իրականացնել:
Ագրարային համալսարանի աշխատանքային գծով պրոռեկտոր Պարույր Էֆենդյանն «Առաջին լրատվական»-ի հետ զրույցում ասաց, որ այսօրվա իրենց ակցիան նախապես պլանավորված չի եղել: Այս, պրոռեկտորի խոսքով, ըստ էության, պատասխան է երեկվա ՕԵԿ-ի «ակցիաին», երբ Հեղինե Բիշարյանի գլխավորությամբ՝ ՕԵԿ-ի ակտիվիստները հավաքվել են շենքի տարածքում: «Մենք, ուսանողները հավաքվել էինք բողոքելու ՕԵԿ-ի ապօրինի շինարարության դեմ, մեր իրավունքները ոտնահարելու դեմ, որ այն տարածքը, որը կառավարության որոշմամբ մեզ է հատկացված, շինարարություն չկատարվի: Բայց մենք ակցիա չիրականացրեցինք և բացատրեցինք սպասել մինչև դատարանի որոշման հրապարակումը»,- ասաց Էֆենդյանը:
Նշենք, որ ՕԵԿ-ը իր գրասենյակին կից տարածքի շուրջ բարձրացված աղմուկը համարում է քաղաքական և կապում է իրենց ընդդիմադիր դառնալու հետ: Էֆենդյանը, սակայն, մեզ հետ զրույցում հերքեց, թե առհասարակ որևէ քաղաքական ենթատեքստ կա: «Բացարձակապես ես դա չեմ կապում քաղաքականության հետ: Մեզ համար բացարձակապես միևնույն է՝ նրանք ընդդիմություն են, թե դիմություն: Մենք պարզապես ասում ենք մի քանդեք այն գույքը, որը մեզ տվել է կառավարությունը»,- ասաց Էֆենդյանը: Մեր դիտարկմանը, թե ինչո՞ւ ավելի վաղ չէին բարձրաձայնում այն մասին, որ տարածքն իրենց է պատկանում, պրոռեկտորը նկատեց. «Որովհետև իրենք ավելի շուտ չէին քանդում շենքը: Իրենք շենքը սկսեցին քանդել մայիսի 23-ից: Դե հիմա ես եմ հարց տալիս՝ ինչո՞ւ իրենք ավելի վաղ չէին քանդում այդ տարածքը: Հենց դարձան ընդդիմություն, նո՞ր որոշեցին քանդել»:
ՕԵԿ-ից այսօր որևէ մեկը չցանկացավ մեկնաբանել այն փաստը, թե ինչու են հակառակ դատարանի որոշման՝ գրեթե ավարտին հասցրել շինարարությունը, ինչպես նաև, թե ինչպես են գնահատում Ագրարայինի պրոֆեսորադասախոսաուսանողական կազմի բողոքի ակցիան:
Նշենք, որ քաղաքապետարանի ներկայացուցիչները հերթափոխով հսկողություն են իրականացնում, որ ՕԵԿ-ը շինարարական որևէ աշխատանք չտանի:
